- २०८१ फाल्गुण ८ बिहीबार
काठमाडौँ । विश्वकै सबैभन्दा ठुलो क्लब रियल म्याड्रिडले स्पेनिस ला लिगा छोड्ने विषय बहसमा रहेको छ ।
रियल म्याड्रिडका खेलाडी जुड बेलिङ्घमले रातो कार्ड पाएको विवाद पछि रियल म्याड्रिडले ला लिगा छोडेर अर्को युरोपेली लिगमा सर्ने बारे विचार गरिरहेको रिपोर्ट सार्बजनिक भएको छ ।
रियल म्याड्रिडले स्पेनमा रेफ्रीको स्तर निकै मजोर भएको भन्दै ला लिगा छोडेर अर्को प्रमुख युरोपेली लिगमा सर्ने विचार गरिरहेको रिपोर्टमा उल्लेख छ ।
म्याड्रिडको हालै ओसासुना विरुद्धको १-१ को बराबरीमा भएको खेलमा रेफ्री जोसे लुइस मुनुएरा मोन्टेरोले बेलिङ्घमलाई सिधै रातो कार्ड देखाउँदा विवाद उत्पन्न भएको थियो । खेल अधिकारीले २१ वर्षीय खेलाडीले खेलको ३९औं मिनेटमा उनलाई स्पष्ट अपमान गरेको आरोप लगाए, जसले गर्दा उनलाई तुरुन्तै रेड कार्ड देखाएर मैदान बाहिर पठाइयो ।
ला लिगामा कार्यकारी मापदण्डमाथि गम्भीर चिन्ताका बीच, स्पेनी मिडियाहरुले रियल म्याड्रिडले स्पेनको शीर्ष डिभिजनबाट बाहिरिने विषयमा विचार गरिरहेको बताइएको छ । साथै रियल म्याड्रिडले कथित रूपमा इटालीको सिरी ए, फ्रान्सको लिग १ र जर्मनीको बुन्डेसलिगालाई सम्भावित नयाँ घरको रूपमा हेरिरहेको उल्लेख छ ।
म्याड्रिडले ला लिगा छोड्ने विचार एक सनसनीपूर्ण सम्भावना भए पनि, यस्तो कदम चाल्नु त्यति सहज भने नभएको विश्लेषण भइरहेको छ । फिफा, युईएफए र कुनै पनि सम्भावित नयाँ लिगको प्रशासनिक निकायले रियल म्याड्रिडलाई भित्र्याउन विभिन्न अनुमोदन गर्नुपर्ने हुन्छ । यसमा विभिन्न लिगका नियम र प्रक्रिया बाधक हुनसक्ने समेत बताइएको छ ।
अहिलेसम्म कुनै पनि क्लबले एउटा लिग छोडेर अर्को लिगमा गएको कुनै रेकर्ड भने छैन ।
रियल म्याड्रिडले बेलिङ्घमको रातो कार्डको घटनामा मात्र यस्तो निराशा व्यक्त गरेको भने होइन । यस सिजनमा म्याड्रिडले इस्पानियोलसँग १-० ले पराजित भएपछि 'गम्भीर रेफ्री दुर्व्यवहार' लाई उद्धृत गर्दै रोयल स्पेनिश फुटबल फेडरेशनमा औपचारिक उजुरी दर्ता गरेको थियो ।
2024-12-15-07-07-27.gif)
