- २०८१ चैत ९ शनिबार
काठमाडौँ । शनिबारदेखि सुरु हुने इन्डियन प्रिमियर लिग (आईपीएल) मा बलरहरूलाई बल चम्काउन थुक प्रयोग गर्न अनुमति दिइएको छ । यो प्रतिबन्ध पाँच वर्षअघि कोभिडको समयमा लगाइएको थियो ।
क्रिकइन्फोका अनुसार बिहीबार बीसीसीआई (भारतीय क्रिकेट नियन्त्रण बोर्ड) सँगको बैठकमा, आईपीएल टोलीका अधिकांश कप्तानहरूले यो निर्णयलाई समर्थन गरेका थिए ।
मे २०२० मा, कोभिडको समयमा, चिकित्सकीय सल्लाहमा बल चम्काउन थुकको प्रयोगमा अस्थायी प्रतिबन्ध लगाइएको थियो । यद्यपि, खेलाडीहरूलाई बल चम्काउन पसिना प्रयोग गर्न अनुमति दिइएको थियो ।
अन्तर्राष्ट्रिय क्रिकेट परिषद् (आइसीसी) ले सेप्टेम्बर २०२२ मा यो प्रतिबन्ध स्थायी रुपमा लगाएको थियो ।
खेलाडीहरूले बलको एक भागलाई हावामा स्विङ गराउन र्याल र पसिनाको प्रयोग गर्छन् । कोभिडको समयमा, संक्रमण फैलिन नदिन थुकको प्रयोगमा प्रतिबन्ध लगाइएको थियो । स्पिटलले तीव्र गतिका बलरहरूलाई बलको चमक कायम राख्न मद्दत गर्छ । यसले गर्दा बलरहरूलाई बल स्विङ गर्न मद्दत गर्छ । यो एक शताब्दीभन्दा बढी समयदेखि बलिङको अभिन्न अंग रहदै आएको छ ।
यसको मद्दतले, बलरहरूले रिभर्स स्विङ पनि सिर्जना गर्छन्, जसमा बल अपेक्षा गरिएको भन्दा विपरीत दिशामा निस्कन्छ । विकेट धेरै सुख्खा भएको अवस्थामा यो अझ महत्त्वपूर्ण हुन्छ । थुकको प्रयोगले पुरानो बलमा रिभर्स स्विङ प्राप्त गर्न मद्दत गर्छ ।
एकदिवसीय क्रिकेट वा टी-२० क्रिकेटको तुलनामा टेस्ट क्रिकेटमा थुकको प्रयोग बढी प्रभावकारी हुन्छ । टेस्ट क्रिकेटमा बल लामो समयदेखि प्रयोग हुँदै आएको छ । यस कारणले गर्दा, बलरहरूले बलको एक छेउ चम्काएर रिभर्स स्विङ प्राप्त गर्छन् ।
विश्वको सबैभन्दा धनी टी-२० लिगमा थुकको प्रयोगमा लागेको प्रतिबन्ध हटाउने बीसीसीआईको निर्णयपछि, आईसीसीले टेस्ट क्रिकेटमा थुकको प्रयोगमा लागेको प्रतिबन्ध हटाउनेछ वा हटाउँदैन भन्ने कुरा अझै स्पष्ट भएको छैन ।
साथै यस आइपिएलमा ओभर रेटका कारण अबदेखि कप्तानले प्रतिबन्ध भोग्नु नपर्ने भएको छ । साथै फिल्डरको नियम र जरिवाना लाग्ने नियम भने यथावत रहेको छ ।
