रिपब्लिकन सांसद जोन्सन सभामुखमा निर्वाचित

काठमाडौँ । रिपब्लिकन सांसद माइक जोन्सन अमेरिकी संसदको तल्लो सदन हाउस अफ रिप्रिजेन्टेटिभ्सको सभामुखमा पुनः निर्वाचित भएका छन् ।

समाचार एजेन्सी रोयटर्सका अनुसार सभामुख बन्न २१८ मतको आवश्यक रहेकोमा उनले त्यति नै मत प्राप्त गरेका थिए । मिडिया रिपोर्टका अनुसार यो विगत १०० वर्षमा कुनै पनि सभामुखले पाएको सबैभन्दा कम मत हो ।

जोनसनलाई नवनिर्वाचित राष्ट्रपति डोनाल्ड ट्रम्पको समर्थन पनि थियो । तर, ट्रम्पको समर्थनका बाबजुद पनि उनले जितका लागि कडा मेहनत गर्नुपरेको थियो । मतदानको सुरुमै उनको रिपब्लिकन पार्टीका ३ सांसदले उनलाई समर्थन गर्न अस्वीकार गरेका थिए ।

यसपछि जोनसनले बहुमत ल्याउन ४५ मिनेट लबिङ गरेका थिए । त्यसपछि मात्रै उनले २ रिपब्लिकन सांसदको समर्थन पाएका थिए, जसका कारण उनी बहुमत हासिल गर्न सफल भए । लुइसियानाका सांसद माइक जोन्सन २०२३ मा सोही सदनको सभामुख निर्वाचित भएका थिए ।