- २०८१ पौष १२ शुक्रबार
काठमाडौँ । धेरै सैन्य ब्लगरहरू र उड्डयन विशेषज्ञहरूले रुसले बुधबार दुर्घटनाग्रस्त अजरबैजान एयरलाइन्सको विमानलाई गोली हानेको आरोप लगाएका छन् ।
यो विमान दुर्घटनामा ३८ जनाको मृत्यु भएको छ । विमानमा चालक दलका सदस्यसहित ६७ जना सवार थिए । बाँकी २९ जनाको सकुशल उद्धार गरिएको थियो ।
रुसको विरुद्धमा अहिलेसम्म कुनै प्रमाण नभेटिए पनि विज्ञहरूले रुसको वायु रक्षाले यो विमान युक्रेनी ड्रोन भएको भन्दै खसालेको बताएका छन् ।
केही प्रत्यक्षदर्शीले पनि विस्फोटको आवाज सुनेको बताएका छन् । सोही क्रममा दुर्घटनाग्रस्त विमानका तस्बिरबाट बमको छर्राका कारण प्वाल परेको देखिन्छ । तर, कतिपयले यो विमान युक्रेनी ड्रोन आक्रमणको सिकार भएको वा नेभिगेसन प्रणाली जानाजानी जाम गरिएको दाबी पनि गरेका छन् । यसैबीच रुस सरकारले अनुसन्धान प्रतिवेदन आउनुअघि नै अनुमान लगाउनु गलत भएको बताएको छ ।
रुसी सरकारका प्रवक्ता दिमित्री पेस्कोभले भने, 'अनुसन्धान पूरा हुनु अघि कुनै पनि परिकल्पनालाई अगाडि बढाउनु गलत हुनेछ । हामी यो पटक्कै गर्दैनौं, अरू कसैले यो गर्नु हुँदैन। हामीले अनुसन्धान पूरा नभएसम्म पर्खनुपर्छ।'
बुधबार अजरबैजानको राजधानी बाकुबाट रुसको चेचन्या जाँदै गरेको अजरबैजान एयरलाइन्सको विमान दुर्घटना भएको थियो । बाक्लो कुहिरोका कारण यो विमानको रुट पनि परिवर्तन गरिएको थियो ।
दुर्घटनामा बाँचेका एक यात्रुले रुसी टिभीलाई भने कि उनले सोचेका थिए 'सम्भवतः ग्रोज्नीमा बाक्लो कुहिरोमा पाइलटले दुई पटक विमान अवतरण गर्ने प्रयास गरे, तर तेस्रो प्रयास गर्नु अघि केही विस्फोट भयो र विमानको केही भाग उड्यो र टुक्रियो ।'
2024-12-15-07-07-27.gif)
