- २०८१ चैत १० आइतबार
काठमाडौं । डा. सिके राउतले नेतृत्वको जनमत पार्टी र रेशम चौधरी संरक्षक रहेको नागरिक उन्मुक्ति पार्टी नागरिक उन्मुक्तिबीच पार्टी एकता हुने भएको छ ।
नागरिक उन्मुक्तिको केन्द्रीय समितिको बैठकपछि संरक्षक रेशम चौधरीले दुवै दलबीच एकता प्रक्रिया अगाडी बढेको जानकारी दिएका हुन् ।
बैठकले जनमतसँग एकता गर्ने निर्णय र तयारीको लागि कार्यदल बनाएको चौधरीले जानकारी दिएका छन् ।
पार्टी एकतापछि जनमत पार्टीका अध्यक्ष सिके राउत अध्यक्ष हुने छन् भने रेशम चौधरी संरक्षक र रञ्जिता श्रेष्ठ सहअध्यक्ष बन्ने सहमति भएको छ ।
जनमतले यसअघि नै नाउपासँग एकताको लागि उपाध्यक्ष अब्दुल खानको नेतृत्वमा कार्यदल बनाइसकेको छ । कार्यदलमा प्रवक्ता यादव र सचिव बालगोविन्द चौधरी सदस्य छन्।
दुवै दलबीच एकता भएमा यो दल तराई मधेशको सबैभन्दा ठुलो पार्टी बन्ने भएको छ । यी दुई पार्टीबीच एकता भएपछि प्रतिनिधि सभामा १० सीटसहित छैटौँ ठुलो दल बन्नेछ । संसद्मा माधव नेपाल नेतृत्वको एकीकृत समाजवादीसँग पनि १० सीट नै छ ।
