- २०८१ चैत १० आइतबार
काठमाडौँ । इन्डियन प्रिमियर लिग (आइपिएल) को १८औं संस्करण आजदेखि सुरु हुदै छ ।
यस सिजनको आइपिएलको उद्घाटन खेल कोलकोतास्थित इडन गार्डेन क्रिकेट स्टेडियममा हुदै छन् । पहिलो खेलमा आज डिफेन्डिङ च्याम्पियन कोलकोता नाइट राइडर्स र रोयल च्यालेन्जर्स बैंगलुरु (आरसीबि) बीच हुदै छ । यो खेल नेपाली समय अनुसार साँझ ७: ४५ बजेदेखि शुरु हुदै छ ।
यस सिजनमा १० फ्रेन्चाइजीले खेल्दै छन् । गत डिसेम्बरमा मेगा अक्सनपछि यस सिजनमा केहि हाई प्रोफाइल खेलाडीको फ्रेन्चाइजी परिवर्तन भएको छ । जसमा ऋषव पन्तले दिल्ली क्यापिटल्स छोडेर लखनउ सुपरजाइन्ट पुगेका छन् । त्यस्तै यसअघि लखनउबाट खेलिरहेका केएल राहुल दिल्ली पुगेका छन । त्यस्तै कोलकोता नाइट राइडर्सलाई गत सिजनमा उपाधि जिताएका श्रेयस अय्यर यस पटक पञ्जाव किंग्समा पुगेका छन् ।
त्यसैगरी यस सिजनमा केहि फ्रेन्चाइजीको कप्तान पनि परिवर्तन भएका छन् । जसमा कोलकोताले आजिख्य रहानेलाई कप्तान बनाएको छ भने दिल्लीले अक्षर पटेललाई कप्तान बनाएको छ । त्यस्तै लखनउको कप्तानी ऋषवले गर्दै छन् भने पञ्जावको कप्तानी अय्यरले गर्दै छन् ।
प्रतियोगिता मार्च २२ मा डिफेन्डिङ च्याम्पियन कोलकाता नाइट राइडर्स र रोयल च्यालेन्जर्स बैंगलोरबीच खेलिने पहिलो खेलबाट सुरु हुनेछ । यस वर्ष, ६५ दिनमा १३ वटा स्थानमा १० टोलीहरू बीच कुल ७४ खेलहरू खेलाइनेछ, जसमा ७० लिग राउन्ड र चार प्लेअफ खेलहरू समावेश छन् । फाइनलसहित सबै प्लेअफ खेलहरू मे २० देखि २५ सम्म हैदराबाद र कोलकातामा खेलाइनेछ ।
अहिलेसम्म उपाधि विजेता
२००८ मा सुरु भएको यो प्रतियोगिता टि-२० क्रिकेटको विश्वकै ठुलो टी-२० क्रिकेट प्रतियोगिताको रुपमा स्थापित भएको छ ।
आइपिएलको डिफेन्डिङ च्याम्पियन भने कोलकोता नाइट राइडर्स हो । आइपिएलको उपाधि अहिलेसम्म चेन्नई सुपर किंग्स र मुम्बई इण्डियन्सले सबैभन्दा बढी ५-५ पटक जितेका छन् । चेन्नईले २०१०, २०११, २०१८, २०२१ र २०२३ मा उपाधि जितेको थियो भने मुम्बईले २०१३, २०१५, २०१७, २०१९ र २०२० मा आइपिएलको उपाधि जितेको थियो ।
त्यस्तै कोलकता नाइट राइडर्सले ३ पटक आइपिएल जितेको छ । कोलकोताले २०१२, २०१४ र २०२४ मा उपाधि जितेको थियो ।
त्यस्तै गुजरात टाइटन्सले २०२२ मा, राजस्थान रोयल्सले २००८ मा, सनराईजर्स हैदरावादले २०१६ मा र डेकन चार्जरले २००९ मा गरी एक एक पटक आइपिएलको उपाधि जितेका छन् । त्यस्तै नियमित आइपिएल खेलिरहेका दिल्ली क्यापिटल्स, पञ्जाव किंग्स र रोयल च्यालेन्जर्स बैन्ग्लुरु (आरसीबी) ले अहिलेसम्म आइपिएल जित्न सकेका छैनन् । त्यस्तै २ सिजन खेलेको लखनउ सुपर जाइन्ट, एक सिजन खेलको राइजिंग पुने सुपर जाइन्ट, गुजरात जाइन्टले पनि आइपिएल उपाधि जित्न असफल भएका छन् ।
प्रमुख किर्तिमान
विराट कोहलीको सर्वाधिक रन
रोयल च्यालेन्जर्स बैंगलुरु (आरसीबी) का पूर्व कप्तान विराट कोहलीले आफ्नो टोलीका लागि ट्रफी जित्न नसके पनि उनको व्यक्तिगत प्रदर्शनमा कहिल्यै गिरावट आएको छैन । कोहली आईपीएल इतिहासमा सर्वाधिक रन बनाउने खेलाडी हुन् । उनले २००८ देखि २०२४ को आइपिएलसम्म २५२ खेल खेल्दै १३१.९७ को स्ट्राइक रेटमा ८००४ रन बनाएका छन् । त्यस्तै शिखर धवन धेरै रन बनाउने हिसाबले दोस्रो स्थानमा छन्, उनले गत वर्ष मात्र सन्यास लिएका थिए । उनले २२१ खेल खेल्दै ६७६९ रन बनाएका छन् भने रोहित शर्मा ६६२८ रनका साथ तेस्रो स्थानमा छन् ।
चहल सर्वाधिक विकेट लिने बलर
स्टार स्पिनर युजवेन्द्र चहललाई भारतीय टोलीमा आफ्नो स्थान बनाउन संघर्ष गरिरहे पनि आइपिएलमा उनको जादु चलिरहेको छ । यसअघि उनले मुम्बई इन्डियन्स, आरसीबी र राजस्थान रोयल्सबाट खेलिसकेका छन् र यस पटक पञ्जाव किंग्सबाट खेल्दै छन् । उनलाई पञ्जावले मेगा अक्सनमा १८ करोड भारुमा किनेको थियो । यी दायाँहाते बलरले आईपीएलमा सबैभन्दा धेरै विकेट लिने कीर्तिमान आफ्नो नाममा राखेका छन् । उनले १६० खेलमा ७.८४ को इकोनोमीमा अहिलेसम्म २०५ विकेट लिएका छन्।
सबैभन्दा धेरै छक्का प्रहार गर्ने क्रिस गेल
वेस्ट इन्डिजका पूर्व ब्याट्सम्यान क्रिस गेल आइपीएलमा सबैभन्दा धेरै छक्का प्रहार गर्ने ब्याट्सम्यान हुन् । उनले १४२ खेलमा ३५७ छक्का प्रहार गरेका छन् । 'युनिभर्स बोस' गेल यस लिगमा कोलकोता, पञ्जाव किंग्स र आरसीबीबाट खेलेका तिह्ये । यस सूचीमा रोहित शर्मा (२८०) र विराट कोहली (२७२) क्रमशः दोस्रो र तेस्रो स्थानमा छन् ।
सर्वाधिक चौका प्रहार गर्ने ब्याट्सम्यान शिखर धवन
आईपीएल इतिहासमा दोस्रो सर्वाधिक रन बनाउने खेलाडी शिखर धवनले गत वर्ष सन्यासको घोषणा गरेका थिए । उनी आइपिएलमा सबैभन्दा धेरै चौका प्रहार गर्ने खेलाडी हुन् । उनले २२२ खेलमा ७६४ चौका प्रहार गरेका छन् । यस मामिलामा विराट कोहली दोस्रो स्थानमा छन् । उनले अहिलेसम्म खेलेका २५२ खेलमा ७०५ चौका प्रहार गरिसकेका छन् । उनले आगामी सिजनमा धवनलाई पछाडि छोड्न सक्छन् ।
