सोलुखुम्बूमा हिमपातपछि सडक अवरुद्ध

सोलुखुम्बु । सोलुखुम्बूमा हिमपात भएपछि जिल्लाको तल्लो क्षेत्रमा सडक अवरुद्ध भएको छ ।

हिउँ जमेपछि लिखुपिके गाउँपालिका–५ भकान्जे लप्सु हुँदै लामजुरासम्मको सडक अवरुद्ध भएको जिल्ला प्रहरी कार्यालयले जानकारी दिएको छ । अवरुद्ध सडक खुलाउने प्रयास गरिएको भएपनि हिमपात ठुलो भएकाले खुलाउन समय लाग्ने प्रहरीले जनाएको छ ।

सडकमा हिउँमा चिप्लिएर सवारीसाधन दुर्घटना हुने सम्भावना भएकाले पताले, लामाजुरालगायत क्षेत्रमा यात्रा गर्ने सबैलाई सावधानी अपनाउन प्रहरीले अपिल गरेको छ । माथिल्लो सोलुखुम्बूमा यसअघि नै हिमपात भए तल्लो सोलुमा भने यसवर्ष पहिलो पटक हिमपात भएको हो । हिउँ परेपछि यहाँको जनजीवन प्रभावित बनेको छ ।