काठमाडौं । कीर्तिमानी २१औं पटक ग्रान्डस्लाम जित्ने लक्ष्यमा रहेका राफेल नाडाल अष्ट्रेलियन ओपन टेनिसको सेमिफाइनलमा प्रवेश गरेका छन् ।
मंगलबार सम्पन्न क्वाटरफाइनलको खेलमा नाडालले क्यानेडियन खेलाडी डेनिस शापोभालोभलाई ५ सेटमा ३-२ ले पराजित गर्दै सेमिफाइनलमा पुगेका हुन् ।
शुरुका दुई सेट ६-३, ६-४ ले जितेका नाडाललाई त्यसपछिका दुई सेटमा शापोभालोभले ६-४ र ६-३ ले पराजित गरेका थिए । त्यसपछि भएको पाँचौं सेटमा नाडालले ६-३ ले सेट जितेर आफ्नो जित सुनिस्चित गरेका थिए ।
अब नाडालले सेमिफाइनलमा गाएल मोनफिल्स र माटेओ बेरेट्टीनीबीचको विजेतासँग खेल्ने छन् ।
नाडाल यसपटक कीर्तिमानी २१औं पटक ग्रान्डस्लाम जित्ने लक्ष्यमा छन् । हालसम्म नाडालसँगै नोभाक जाकोभिच र रोजर फेडेररले समान २० पटक प्रतियोगिता जितेका छन् । ३५ वर्षीय नाडाल गत वर्ष क्वाटरफाइनलबाटै बाहिरिएका थिए ।