हालाण्डले पेनाल्टी मिस गर्दा बराबरीमा रोकियो म्यानचेस्टर सिटी

काठमाडौँ । इङलिश प्रिमियर लिग अन्तर्गत म्यानचेस्टर सिटी एभर्टनसँग बराबरीमा रोकिएको छ । विहिबार सम्पन्न खेलमा म्यानचेस्टर सिटी एभर्टनसँग १-१ गोलको बराबरीमा रोकिएको हो ।

सिटीले खेलको ५३औँ मिनेटमा पाएको पेनाल्टी गोलमा परिणत गर्न नसकेपछि बराबरीमा चित्त बुझाएको थियो । सिटीका लागि इर्लिंग हालाण्डले पेनाल्टी मिस गरेका थिए ।

सिटीले बेर्नार्न्डो सिल्भाले खेलको १४औं मिनेटमा गोल गर्दै शुरुवाती अग्रता दिलाएका थिए । त्यसपछि लिम्यान एनडियाएले खेलको ३६औं मिनेटमा गोल गर्दै खेल बराबरी गरेका थिए ।

म्यानचेस्टर सिटीले यस सिजनमा खराब प्रदर्शनको सिलसिला जारी राखेको छ । सिटीले लिगका पछिल्ला १३ खेलमा केवल एक जित र तीन बराबरी खेलेको छ । 

यो बराबरीपछि म्यानचेस्टर सिटीको १८ खेलमा २८ अंक भएको छ र लिगमा छैटौं स्थानमा रहेको छ । त्यस्तै एभर्टनको १७ खेलमा १७ अंक रहेको छ र १५औं स्थानमा रहेको छ ।