फ्रान्सको मिलोस शहरमा चक्कु प्रहार: एक जनाको मृत्यु, दुई प्रहरी घाइते

काठमाडौँ । पूर्वी फ्रान्सको मिलोस शहरमा छुरा प्रहारको घटनामा एक जनाको मृत्यु भएको छ भने दुई प्रहरी गम्भीर घाइते भएका छन् ।

घटनास्थलबाट ३७ वर्षीय अल्जेरियन पुरुषलाई पक्राउ गरिएको छ। उनीविरुद्ध आतंकवाद मुद्दाको अनुसन्धान सुरु गरिएको छ ।

शंकास्पद व्यक्तिले दुई प्रहरीलाई गम्भीर घाइते बनाएको बताइएको छ । एक प्रहरीको घाँटीमा र अर्कोको छातीमा चोट लागेको मिडिया रिपोर्टमा उल्लेख छ ।

यसैबीच, घटनामा हस्तक्षेप गरेका ६९ वर्षीय पोर्चुगिज पुरुषलाई चक्कुको चोटका कारण मृत्यु भएको छ । संदिग्ध व्यक्ति आतंकवाद निगरानी सूचीमा भएकोले उनलाई देश निकाला गर्न आदेश दिइएको थियो ।

राष्ट्रपति इमानुएल म्याक्रोंले घटनामा प्रतिक्रिया दिदै यो आतंकवादी हमला थियो भन्नेमा कुनै शंका नरहेको बताएका छन् ।

यो घटना प्रजातान्त्रिक गणतन्त्र कंगोको समर्थनमा भएको प्रदर्शन नजिकै भएको थियो, जहाँ प्रहरी अधिकारीहरू गस्तीमा थिए ।