फिल्म ‘मिसिङः केटी हराएको सूचना’को नयाँ गीत सार्वजनिक

काठमाडौँ । आगामी माघ ११ गतेबाट प्रदर्शनमा आउन लागेको फिल्म ‘मिसिङः केटी हराएको सूचना’को नयाँ गीत सार्वजनिक गरिएको छ ।

काठमाडौंमा एक कार्यक्रमका बीच सार्वजनिक ‘सपनीमा’ बोलको रोमान्टिक गीतमा करुण थापाको शब्द तथा संगीत छ भने इन्दिरा जोशी र करण परियारको स्वर छ । करुणले २० वर्षपछि यही गीतमार्फत् पार्श्व गीत लेखनमा कमब्याक गरेका हुन् ।

गीतको भिडियोमा फिल्मका मुख्य अभिनेता नाजिर हुसेन र अभिनेत्री सृष्टि श्रेष्ठबीचको प्रेम देखाइएको छ । रामजी लामिछानेको कोरियोग्राफीमा तयार भएको भिडियोमा नाजिरले परिकल्पना गरेको कुरालाई कलात्मक ढंगले प्रस्तुत गरिएको छ । गीतको संगीत, गायन र शब्द रचना अब्बल छ ।

दीपेन्द्र गौचनको लेखन, निर्माण एवं निर्देशनमा तयार भएको फिल्ममा नाजिर र सृष्टिसहित सञ्जय गुप्ता, रामनारायण ठाकुर, मदन ठाकुर, रिना रिमाल, कौशल्या ठाकुर, ललितादेवी मिश्र, रुपेश मण्डल, सुदीप पटेल, अनिल कुर्मी, अर्जुन पोखरेल, ओमप्रकाश कर्णलगायतको अभिनय छ । फिल्मका कार्यकारी निर्माता नकिम उद्दिन हुन् ।

>