काठमाडौं । भारतीय विदेशमन्त्री सुष्मा स्वराजले पूर्वप्रधानमन्त्री पुष्पकमल दाहालको पुत्रवियोगप्रति शोक व्यक्त गरेकी छिन् ।
आइतबार अचानक हृदयाघातका कारण प्रचण्ड पुत्र प्रकाश दाहालको मृत्यु भएको थियो । विदेशमन्त्री स्वराजले ट्विट गर्दै शोकसन्तप्त परिवारप्रति समवेदना प्रकट गरेकी हुन् ।
प्रकाश दाहालको राति घरमा सुतेको अवस्थामा मृत्यु भएको थियो । उनलाई बिहानै नर्भिक अस्पताल लगिए पनि अस्पतालले मृत घोषित गरेको थियो ।
झापा रहेका प्रकाशका पिता प्रचण्ड काठमाडौं आएपछि अस्पतालले औपचारिक रुपमा मृत्युको कारणबारे बताएको थियो । अस्पतालका अनुसार उनको आकस्मिक हृदयाघातबाट मृत्यु भएको हो ।
मृतक दाहालको पार्थिव शरीर अहिले पार्टी कार्यालय पेरिसडाँडामा रहेको छ । उनको आजै पशुपति आर्यघाटमा अन्तिम दाहसंस्कार गरिने जनाइएको छ ।