फिल्म मंगलम-२ निर्माण हुने, नवल नेपालले निर्देशन गर्दै

काठमाडौँ । २०७४ सालमा निर्माण भएको फिल्म ‘मंगलम’ को दोस्रो भाग ‘मंगलम-२’ निर्माण हुने भएको छ। छविराज ओझा र दिजेन्द्र शाक्यको निर्माण रहने फिल्म ‘मंगलम-२’ मा नवल नेपालको निर्देशन रहनेछ ।

छविराज प्रोडक्सन र गुण सिनेमा प्रालिको व्यानरमा ‘मंगलम-२’ निर्माण हुनेछ । नवलले यसअघि यो व्यानरका दुई फिल्म ‘लज्जा’ र ‘मंगलम’ निर्देशन गरेका थिए । 

निर्देशक नेपालले फरक कलाकार र फरक कथामा फिल्म बन्ने जानकारी दिए । मंगलममा  प्रमुख भूमिकामा रहेका अभिनेता पुष्प खड्का र अभिनेत्री शिल्पा पोखरेल भने यस फिल्ममा नदोहोरिने निर्माण टिमले जानकारी दिएको छ ।

फिल्म ‘मंगलम’ को गीत ‘पर्खपर्ख मायालु’ अहिले पनि उत्तिकै लोकप्रिय छ ।

‘मंगलम-२’ का लागि निर्माता ओझाले निर्देशक नेपाललाई आइतबार अनुबन्ध गरेका छन् । निर्माता ओझाका अनुसार फिल्मका कलाकार तथा प्राविधिक केही समयपछि सार्वजनिक हुनेछन् ।