करिब १६१ किलोग्राम गाँजासहित तीन जना पक्राउ

पर्सा, वीरगंज महानगरपालिका-१८ भवानीपुर सिताराम चोकस्थित सडकबाट अवैध लागूऔषध गाँजा १ सय ६० किलोग्राम सहित २ जनालाई आइतबार राति प्रहरीले पक्राउ गरेको छ ।

पक्राउ पर्नेहरूमा मकवानपुर हेटौंडा उपमहानगरपालिका-७ कमाने बस्ने ४४ वर्षीय कृष्ण घलान र चितवन राप्ती नगरपालिका-३ बस्ने २० वर्षीय रोनाल विश्वकर्मा रहेका छन् ।

जिल्ला प्रहरी कार्यालय पर्साबाट खटिएको प्रहरीले परवानीपुरबाट ड्राइपोर्टतर्फ जाँदै गरेको ना.३ ख ४२१२ नम्बरको ट्रकलाई जाँच गर्ने क्रममा ट्रकको हुटमा फल्स बनाई प्लाष्टिकमा बेरी लुकाइ छिपाई राखिएको १६ वटा पोकामा उक्त परिमाणको गाँजा फेला पारी चालक कृष्ण र ट्रकमा सवार रोनाललाई पक्राउ गरेको हो । 

सुनसरी, बराहक्षेत्र नगरपालिका-२ जब्दीबाट अवैध लागूऔषध गाँजा १ किलो ४ सय ग्राम सहित भोजपुर हतुवागढी गाउँपालिका-३ सिन्द्राङ बस्ने २२ वर्षीय निकेश राईलाई आइतबार साँझ प्रहरीले पक्राउ गरेको छ । इलाका प्रहरी कार्यालय चतराबाट खटिएको प्रहरीले उनलाई उक्त गाँजा सहित पक्राउ गरेको हो । 

यस सम्बन्धमा प्रहरीले आवश्यक अनुसन्धान गरिरहेको जनाएको छ ।