आज पनि भएन एकीकृत समाजवादीका नेताहरुको कार्यविभाजन

काठमाडौँ । नेकपा (एकीकृत समाजवादी) का केन्द्रिय सदस्यहरुको कार्यविभाजन सोमबार मात्र हुने भएको छ ।

केन्द्रिय सदस्यहरुको कार्यविभाजन टुंग्याउन मंसिर २६ गतेबाट शुरु भएको पार्टी स्थायी कमिटिको बैठकमा आजसम्म पार्टीको अगामि कार्ययोजनाबारे छलफल भएको पार्टी प्रवक्ता जगन्नाथ खतिवडाले जानकारी दिएका छन् ।

उनकाअनुसार आज बैठकमा नेताहरुले पार्टीको आगामी कार्ययोजना निर्माण गर्ने विषयमा धारणा राखेका थिए । उनले भोलि बस्ने बैठकमा अध्यक्ष माधव नेपाल र महासचिव घनश्याम भुसाल आफ्नो धारणा राख्दै बैठक टुंग्याउने जानकारी दिए ।

उनले भने, ‘यो बैठकमा हाम्रा मुख्यः दुई एजेण्डाहरु छन् । एउटा, पार्टीको अगामि कार्ययोजना र अर्को एजेण्डा केन्द्रिय सदस्यहरुको कार्यविभाजन । आजसम्म  हामीले पार्टीको कार्ययोजनाको बारेमा छलफल गरेका छौं । स्थायी कमिटिा सबै सदस्यहरुले लगभग बोलिसक्नु भएको छ । अब पार्टी अध्यक्ष र महसचिवले आफ्नो धारणा राख्ने, उहाँहरुको विचारहरुप्रति स्पष्टिकरण दिने र निष्कर्षमा पुग्ने काम बाँकी छ । त्यो भोलि हुन्छ । अनि हामी कार्य विभाजनको प्रस्तावमा छलफल गर्छौं । त्यो कार्यविभाजन भोलि सकिन्छ।’

सोमबारको बैठकमा नेताहरुको जिम्मेवारी तोक्ने र पार्टीको सुदृढीकरण गर्ने, आगामी निर्वाचनको तयारी, राजनीतिक तथा भूराजनीतिक चुनौतीलगायतको विषयमा पनि निर्णय लिने भएको छ ।