हिजाब नलगाएर गीत गाउने इरानी गायिका पक्राउ

काठमाडौँ । भर्चुअल गीत गाएको आरोपमा इरानमा २७ वर्षीय गायिका परस्तु अहमदी पक्राउ परेकी छन् ।

गायिकाले गीतको समयमा हिजाब लगाएकी थिइनन् र उनले यो भिडियो सोशल मिडियामा पोस्ट गरेकी थिइन्। उनको गीतलाई अहिलेसम्म १५ लाखभन्दा बढीले हेरिसकेका छन् र सुनिसकेका छन् ।

मिडिया रिपोर्टका अनुसार गायिकाको पहिचान परस्तु अहमदीको रूपमा गरिएको छ। परस्तुलाई शनिबार इरानको सारी शहरबाट पक्राउ गरिएको हो । सारी इरानको माजानदारन प्रान्तको एउटा सहर हो, जुन राजधानी तेहरानबाट करिब २८० किलोमिटर टाढा छ । परस्तुले आफ्नो गीतको भिडियो युट्युबमा शेयर गरेपछि बिहीबार परस्तुविरुद्ध मुद्दा दर्ता भएको हो । भिडियोमा परस्तु कालो स्लिभलेस पहिरनमा परफॉर्म गरिरहेको देखिन्छ । 

सञ्चारमाध्यमका अनुसार परस्तुको पछाडि उभिएका चार संगीतकारविरुद्ध पनि मुद्दा दर्ता भएको छ । उनीहरुमध्ये दुई जनालाई राजधानी तेहरानबाट पनि पक्राउ गरिएको छ । 

इरानमा महिलाहरूले हिजाब लगाउन अनिवार्य छ र इरानले यो नियम पालन नगर्ने महिलाहरू विरुद्ध कडा कारबाही गरेको इतिहास छ। सन् २०२२ मा पनि इरानमा हिजाबको विरुद्धमा व्यापक विरोध प्रदर्शन भएको थियो ।

हिजाब नलगाएको भन्दै इरानी प्रहरीले यातना दिएकी २२ वर्षीया महसा अमिनीको मृत्यु भएपछि विरोध प्रदर्शन सुरु भएको थियो ।

केही महिनाअघि इरानबाट हिजाब नलगाएको भन्दै एक विद्यार्थीलाई इरानको नैतिक पुलिसले कुटेको समाचार आएको थियो । यही कुटपिटका कारण विद्यार्थी कोमामा गए र केही दिनपछि उनको मृत्यु भयो ।