राजकुमार ह्यारीलाई महारानीले उपहार दिएको दरबार खोसियो

काठमाडौँ । राजकुमार ह्यारी र उनकी पत्नी मेगनलाई बेलायतको शाही दरबार विन्डसर इस्टेटबाट निष्कासन गरिएको छ ।

मिडिया रिपोर्टका अनुसार अब राजकुमार ह्यारीको बेलायतमा कुनै ठाउँ रहने छैन । राजकुमार ह्यारी र उनकी श्रीमती मेगन हाल अमेरिकामा बस्दै आएका छन् । विन्डसर इस्टेटमा अवस्थित फ्रोगमोर कटीजलाई स्वर्गीय महारानी एलिजाबेथ द्वितीयले राजकुमार ह्यारीलाई विवाहको उपहारको रूपमा दिएकी थिइन् । फ्रोगमोर कटीजको पुनर्निर्माणमा २.४ मिलियन पाउण्डमा गरिएको थियो ।

बेलायती मिडियाका अनुसार यो दरबार अब राजकुमार एन्ड्र्यूलाई प्रस्ताव गरिएको छ । यसपछि प्रिन्स एन्ड्र्यूको वार्षिक अनुदान २.५ लाख पाउण्डले कटौती गर्न सकिने र उनले आफ्नो हालको ३० कोठाको रोयल लज छोड्न पर्ने हुनसक्ने बताइएको छ ।

ससेक्सका ड्यूक र डचेस, प्रिन्स ह्यारी र मेगन मर्केललाई जनवरीमा नै दरबार खाली गर्न निर्देशन दिइएको छ । प्रिन्स ह्यारी र उनकी श्रीमती मेगन सन् २०२० मा क्यालिफोर्निया, अमेरिका सरेका थिए र प्रिन्स ह्यारी र उनकी श्रीमतीले पनि शाही हैसियत त्यागेका थिए । राजकुमार ह्यारी र उनकी श्रीमती मेगन त्यसपछि नेटफ्लिक्स डकुमेन्ट्रीमा देखा परेका थिए । यस वृत्तचित्रमा, राजकुमार ह्यारीले राजतन्त्रको बारेमा धेरै खुलासा गरे, जसले धेरै हंगामा मच्चाएको थियो ।

विगतमा, प्रिन्स ह्यारीको जीवनी स्पेयर बजारमा आएको थियो । यस पुस्तकको रेकर्ड प्रतिहरू बिक्री भइसकेका छन्, तर यस पुस्तकमा राजकुमार ह्यारीले यस्ता धेरै खुलासा गरेका छन्, जसका कारण उनको निकै आलोचना भएको छ । बकिङ्घम प्यालेसले यस विषयमा अहिलेसम्म कुनै प्रतिक्रिया दिएको छैन ।