फिल्म ‘सारंग’ को ट्रेलर सार्वजनिक

काठमाडौँ । अभिनेत्री ऋचा शर्माको मुख्य भूमिका तथा प्रस्तुति रहेको फिल्म ‘सारंग’को ट्रेलर सार्वजनिक गरिएको छ ।

बिहीबार सार्वजनिक ट्रेलरमा रिवारिक कलहले बच्चामा पर्ने मनोवैज्ञानिक असर र एउटै उमेर समूहका दुई अलग आर्थिक हैसियतका बालकहरुको घनिष्ट मित्रतालाई देखाइएको छ । फिल्ममा ऋचाले आमाको भूमिका निभाएकी छन् ।

कोरियोग्राफरको रुपमा परिचित प्रशान्त तामाङको लेखन तथा निर्देशनमा तयार भएको फिल्ममा ऋचासहित उत्पल झा, सुरज तमु, समीरमणि दीक्षित, मणि के राई, अनिषा न्यौपाने, निरज ब्ल्याक, विश्व स्याङ्बो, दीपिका थापा, सुमन सागर जंग केसी, प्रभात श्रेष्ठ, बालकलाकारद्वय सम्राट थापा र आदित्य कार्की लगायतको अभिनय छ ।

यही माघ २५ गतेबाट प्रदर्शनमा आउन लागेको फिल्मको निर्माता प्रेम तामाङ र फूलमाया तामाङ हुन् । पुष्पा लिम्बू र बिनु गुरुङ सह-निर्माता रहेको फिल्ममा शंकर थापा ‘स्माइल’ र नकुल कार्कीको संगीत, सुष्मा राईको कोरियोग्राफी, गोपाल रायको छायांकन र मित्र डि गुरुङको सम्पादन छ । फिल्मले बाल मनोविज्ञान र धनी-गरिबबीचको बढ्दो खाडलको कथा देखाउने जनाइएको छ ।