च्याम्पियन्स लिगमा बार्सिलोनाको शानदार कमब्याक जित

काठमाडौँ । युइएफए च्याम्पियन्स लिग अन्तर्गत बार्सिलोनाले शानदार कमब्याक जित हासिल गरेको छ ।

गएराती सम्पन्न रोमाञ्चक खेलमा बार्सिलोनाले पोर्चुगीच क्लब बेनिफिकालाई ५-४ गोल अन्तरले पराजित गरेको हो ।

बार्सिलोना एक समय ३-१ र ४-२ गोल अन्तरले पछि परेको अवस्थामा खेलमा कमब्याक गर्दै जित निकालेको थियो ।

बार्सिलोनाका लागि रोबेर्ट लेवानडोस्की र राफिन्हाले २-२ गोल गरेका थिए भने एरिक गार्सियाले एक गोल गरेका थिए ।

त्यसैगरी बेनिफिकाका लागि भानगेलिस पाभलिडिसले ह्याट्रिक गरेका थिए भने बार्सिलोनाका रोनाल्ड अराउजोले आत्मघाती गोल गरेका थिए । यस खेलमा बेनिफिकाका अर्थर काब्रलले खेलको ९८औ मिनेटमा रातो कार्ड पाएका थिए ।

यो जितपछि बार्सिलोनाको ७ खेलमा १८ अंक भएको छ र अंक तालिकामा दोस्रो स्थानमा उक्लिएको छ । साथै बार्सिलोनाको राउण्ड १६ मा पुग्ने लगभग निश्चित देखिएको छ ।

त्यस्तै बेनिफिकाको भने ७ खेलमा १० अंक रहेको छ र १८औ स्थानमा रहेको छ ।