बरुण धवनको फिल्म ‘बेबी जोन’को बक्स अफिसमा खराब शुरुवात

काठमाडौँ । बलिवुड अभिनेता बरुण धवनको बहुप्रतिक्षित फिल्म ‘बेबी जोन’ रिलिज भएको छ । 

तर, यो फिल्म पहिलो दिनको कलेक्सनको हिसाबले असफल भएको छ । फिल्मको पहिलो दिन बक्स अफिसमा निकै निराशाजनक कलेक्सन गरेको भारतीय मिडियाहरुले उल्लेख गरेका छन् । 

फिल्म ‘बेबी जोन’ ले पहिलो दिन मात्रै १२.५० करोड भारु कमाएको छ । मिडिया रिपोर्टका अनुसार फिल्मको बजेट करिब १८० करोड भारु रहेको छ । फिल्मको पहिलो दिनको कमाईको हिसाबले लागत उठाउन मुश्किल हुने विश्लेषण शुरु भएको छ । 

क्रिसमसको दिन फिल्मको कम कमाई ‘बेबी जोन’का निर्माताका लागि ठूलो झटका भन्दा कम छैन ।

अर्कोतर्फ फिल्म ‘पुष्पा २’ ले बक्सअफिसमा अझै दबदबा कायम राखेको छ । टिकट विन्डोमा यो फिल्मको आँधी रोकिने संकेत देखिएको छैन । २१ औं दिनमा यो फिल्म भारतको ११ सय करोड क्लबमा प्रवेश गरेको थियो ।

फिल्मले तेस्रो बुधबार १९.७५ करोड कमाएको थियो । फिल्मको यो कमाई ‘बेबी जोन’को भन्दा धेरै हो । योसँगै फिल्मको कुल कमाई ११०९ करोड पुगेको छ । यो फिल्मले छिट्टै हिन्दी भाषामा ८०० करोड क्लबमा प्रवेश गर्ने विश्वास गरिएको छ ।