- २०८१ पौष १० बुधबार
काठमाडौँ । बंगलादेशकी पूर्वप्रधानमन्त्री शेख हसिनाको समस्या अन्त्य हुने देखिएको छैन । मोहम्मद युनुसको सरकारले उनीमाथि लगातार नयाँ आरोप लगाउँदै आएको छ । अब बंगलादेशको भ्रष्टाचार विरोधी आयोग (एसीसी) ले हसिना र उनको परिवारविरुद्ध करिब ५ अर्ब डलर हिनामिना गरेको आरोपमा अनुसन्धान सुरु गरेको छ ।
ढाका ट्रिब्यूनका अनुसार हसिनामाथि राजधानी ढाकाबाट १६० किलोमिटर टाढा रुपपुरमा रुसी डिजाइन गरिएको आणविक उर्जा केन्द्रमा हिनामिना गरेको आरोपमा जाँच शुरु भएको छ ।
रुसको सरकारी कम्पनी रोजाटमले निर्माण गरिरहेको यो प्लान्टमा भारतीय कम्पनीको पनि हिस्सेदारी रहेको छ । केही दिनअघि बंगलादेशको उच्च अदालतले एसीसीलाई यस मामिलामा किन निष्क्रियता देखाएको भन्दै प्रश्न गरेपछि हसिनाविरुद्ध छानबिन सुरु गरिएको छ ।
शेख हसिना, उनका छोरा सजीब वाजेद जोय, बहिनी रेहाना र भतिजी ट्यूलिप सिद्दिकलाई यस मुद्दामा आरोपी बनाइएको छ । उनले हिनामिना गरेको रकम मलेसियाको बैंकमा ट्रान्सफर गरेको आरोप छ ।
मिडिया रिपोर्टका अनुसार टुलिप सिद्दिक, शेख रेहाना र अन्यले मनी लाउन्डरिङ गरिएको रकमको ३० प्रतिशत कमिसन पाएको आरोप छ । शेख हसिना हाल भारतमा बस्छिन्, उनका छोरा अमेरिकामा र भतिजी बेलायतमा छन् । यद्यपि शेख रेहनाको बारेमा अहिलेसम्म कुनै पुष्टि भएको छैन ।
यसअघि सोमबार बंगलादेशले शेख हसिनालाई फिर्ता पठाउन भारतसँग माग गरेको थियो । बंगलादेशका विदेश सल्लाहकार तौहिद हुसेनले पनि यस सम्बन्धमा पत्र पठाएका छन् । तौहिद हुसेनले बंगलादेश सरकारले पूर्वप्रधानमन्त्रीलाई फेरि कानुनको सामना गर्न चाहेको बताउँछन्।
शेख हसिनाका छोरा सजीब वाजेदले यो मागलाई लिएर युनुस सरकारको आलोचना गरेका छन् । उनले लेखे यसले न्यायलाई बाइपास गर्छ र अवामी लीगका नेताहरूमाथि आक्रमणलाई बढावा दिने बताएका छन् ।
बंगलादेशमा कूपछि बनेको युनुस सरकारले हसिनाविरुद्ध हत्या, अपहरणदेखि देशद्रोहसम्मका २२५ भन्दा बढी मुद्दा दर्ता गरेको छ । योसँगै बंगलादेश सरकारले भारतमा रहँदा हसिनाले दिएको अभिव्यक्तिले दुई देशबीचको सम्बन्ध बिगार्ने चेतावनी दिएको छ ।
2024-12-15-07-07-27.gif)
