प्रधानसेनापति सिग्देलद्वारा निरीक्षण भ्रमण

काठमाडौँ ।  प्रधान सेनापति अशोक राज सिग्देलले पूर्वी पृतना हेड क्वार्टर तथा अन्तरगतका युनिटहरुको निरीक्षण भ्रमण गरेका छन् ।

भ्रमणको क्रममा उनले धनकुटास्थित भीमदल गण, झापास्थित अरिदमन गण, पाँचथर स्थित रणशेर गण र ओखलढुङ्गास्थित दुर्गाबक्स गणको निरीक्षण गरेका थिए । सो क्रममा प्रधानसेनापति सिग्देलले उक्त पृतना हे.क्वा. तथा अन्तरगतका युनिटहरूको जिम्मेवारी क्षेत्रको वस्तुस्थिति बारे जानकारी लिई आवश्यक निर्देशन दिनुको साथै सकलदर्जालाई सम्बोधन गरेका थिए ।

निरीक्षण भ्रमणको क्रममा प्रधानसेनापति सिग्देलले श्री नं. १८ वाहिनी अड्डा तथा अन्तरगतका फौजहरु सम्मिलित भई उदयपुरस्थित त्रियुगा इलाकामा सञ्चालन भइरहेको सामुहिक तालिमको निरीक्षण गरेका थिए । निरीक्षणको दौरान प्रधान सेनापतिले सामुहिक तालिमको विविध पक्षहरुका बारेमा जानकारी लिनुका साथै सकलदर्जालाई सम्बोधन समेत गरेका थिए । हाल नेपाली सेनाका युनिटहरुको आ-आफ्नो जिम्मेवारी इलाकाहरुमा सामुहिक तालिम सञ्चालन भइरहेको छ ।