- २०८१ मङ्सिर १९ बुधबार
काठमाडौँ । राष्ट्रिय अवार्ड जित्न सफल ‘बुलाकी’का निर्देशक लक्ष्मण सुनारको दोस्रो फिल्म ‘कल्ली’मा अभिनेता नाजिर हुसेन र अभिनेत्री वर्षा राउतलाई फिल्ममा अनुबन्धित गरिएको छ ।
यस फिल्मका लागि अभिनेता उत्तम प्रधान र सौगात मल्लपछि नाजिर र वर्षा जोडिएका हुन् । आगामी पुष १० गतेबाट छायांकन सुरु हुन लागेको फिल्ममा बेनिशा हमाल, अर्पण थापा, बुद्धि तामाङ, कमलमणि नेपाल, माओत्से गुरुङ, रविन्द्र झा, विनोद न्यौपाने, रेअर राईको पनि अभिनय रहने निर्माता किरण नेपालीले जानकारी दिएका छन् । फिल्ममा महेश दवाडीको पटकथा तथा संवाद लेखन छ । कथा भने निर्देशक सुनार स्वयंको हो ।
पौराणिक कथामा बन्न लागेको फिल्ममा निसाल पौडेलको छायांकन, एसडी योगीको संगीत तथा रामजी लामिछानेको कोरियोग्राफी रहनेछ । फिल्मको निर्माण घोषणा गर्दा आगामी चैत २९ गते अर्थात् नयाँ वर्षलाई प्रदर्शन मिति निश्चित गरिएपनि सो समयमा फिल्म रिलिज नहुने भने निश्चित भएको छ ।
