विपिन र मिरुनाको ‘ऊनको स्वीटर’ बैशाखमा रिलिज हुने

काठमाडौँ । अभिनेता विपिन कार्की र अभिनेत्री मिरुना मगरको शीर्ष भूमिका रहेको फिल्म ‘ऊनको स्वीटर’ आगामी बैशाख २६ गतेबाट प्रदर्शनमा आउने भएको छ ।

एक क्यारेक्टर पोस्टर सार्वजनिक गर्दै रिलिज मिति घोषणा गरिएको छ । सार्वजनिक पोस्टरमा विपिन र मिरुना श्रीमान्-श्रीमतीको भूमिकामा रहेको बुझ्न सकिन्छ । विपिन र मिरुनाले यसअघि फिल्म ‘लालपूर्जा’मा एकसाथ काम गरेका थिए ।

नवीन चौहानको डेब्यु निर्देशनमा तयार भएको फिल्ममा विपिन र मिरुनासहित सुनिल पोखरेल, माओत्से गुरुङ, विल्सन विक्रम राई, प्रेम सुब्बा, एलेक्स पारस, परीक्षा लिम्बु, सुरज तमू, शारदा देवी सिलवाल लगायतको अभिनय छ । फिल्मलाई आर्टमाण्डूले निर्माण गर्दै छ । फिल्ममा निर्देशक चौहान स्वयंको लेखन छ भने उनलाई सुरज कटुवालले सघाएका छन् ।

छायांकनमा जानुअघि फिल्मको ‘फूल’ बोलको गीत सार्वजनिक गरिएको थियो, जसलाई युट्युबमा निकै रुचाइएको छ । ९ महिनामा १ करोड ४० लाखले हेरिसकेको यो गीतमा संगीत र स्वर सुजन चापागाईँको छ भने हर्क साउदको शब्द रचना छ ।