- २०८१ जेठ १ मंगलबार
श्रीलंकन क्रिकेट टिमका पुर्व कप्तान अर्जुना राणातुंगाले सन् २०११ को क्रिकेट विश्वकपको फाइनल खेल फिक्स भएको भन्दै जांच गराउन माग गरेका छन् ।
५३ वर्षीय राणातुंगाले आफ्नो आधिकारिक फेसबुक पेजमा सिम्हली भाषामा एक भिडियो पोष्ट गर्दै आफुले त्यति बेला खेलको कमेन्ट्री गरिरहेको र श्रीलंकाको हारबाट आफु अत्यन्त दुखि भएको उल्लेख गरेका छन् ।
सन २०११ को विश्वकपको उपाधि भारतले श्रीलंकालाई ६ विकेटले पराजित गर्दै जितेको थियो । भारतको मुम्बई स्थित वान्खेडे स्टेडियममा भएको सो फाइनल खेलपछि श्रीलंकाका स्थानीय पत्रिकाहरुमा फाइनल खेल फिक्स भएको खबर सार्वजनिक भएको थियो ।
१९९६ को विश्वकप विहेता टिमका कप्तान समेत रहेका राणातुंगाले अहिले आफुले सबै कुरा सार्वजनिक नगर्ने तर एक दिन यस विषयमा अवश्य बाहिर ल्याउने बताएर क्रिकेट जगतलाई हैरान बनाएका छन् । उनले सो फाइनल खेलको जाँच हुनुपर्ने माग गरेका छन् । उनले कुनै क्रिकेटरको नाम नलिई खेलाडीले एउटा इमेल लुकाएको आरोप लगाएका छन् ।
फाइनलमा श्रीलंकाले पहिले व्याटिंग गर्दै ५० ओभरमा ६ विकेट गुमाएर २७४ रन बनाएको थियो भने भारतले आफ्ना दुई विकेट सचिन तेन्दुलकर र विरेन्द्र सहवागलाई शुरुमै गुमाउदै श्रीलंकाले खेलमा आफ्नो पकड बनाएको थियो । तर गौतम गम्भीर र महेन्द्र सिंह धोनीको साझेदारीले खेल भारतको पक्षमा गएको थियो । सो खेलमा गौतम गम्भीरले ९७ र महेन्द्र सिंह धोनीले ९१ रन बनाएका थिए ।
स्थानीय मिडियाले फाइनल खेल फिक्स भएको खबर प्रकाशित गरेपनि कसैले पनि सो खेलको छानविन भने अहिलेसम्म गरेका छैनन् ।
