- २०८१ बैशाख २५ मंगलबार
धनुषा । रेशम चौधरी संरक्षक रहेको नागरिक उन्मुक्ति पार्टी र रामकुमार महतो अध्यक्ष रहेको नेपाल सद्भावना पार्टीबीच एकीकरण भएको छ ।
पार्टी एकीकरण भएसँगै आगामी एकता महाधिवेशसम्म एकीकृत पार्टीको नाम नागरिक उन्मुक्ति पार्टी नै रहने भएको छ । त्यसैगरी नागरिक उन्मुक्ति पार्टीकै चुनाव चिह्न, झण्डा, छाप र विधान पनि प्रयोग हुनेछ ।
केन्द्रीय निकायदेखि स्थानीय तहसम्म पदाधिकारी तथा सदस्यहरूको समायोजन दुवै पार्टीबीचको आन्तरिक सहमतिअनुसार नै हुने उन्मुक्ति पार्टीका तर्फबाट संरक्षक चौधरी र सद्भावना पार्टीका तर्फबाट महतोले हस्ताक्षर गरेको पत्रमा उल्लेख गरिएको छ ।
एकीकरणपछि जनकपुरधाममा आयोजित कार्यक्रमलाई सम्बोधन गर्दै नेता चौधरीले आफू लामो समयसम्म जेलमा बस्दा मधेसवादी दलले आफूलाई स्वीकार नगरेको टिप्पणी गरे ।
नागरिक उन्मुक्ति पार्टी थारुहरुको हकहित मात्र नभई मधेसी जनताको उन्मुक्तिका लागि सक्रिय रहने बताउँदै उनले केन्द्रीय निकायदेखि स्थानीय तहसम्मका पदाधिकारी तथा सदस्यको समायोजन दुवै पार्टीको आन्तरिक सहमतिअनुसार हुने उल्लेख गरे ।
त्यस्तै नेता महतोले मधेसका जनताको मुक्तिका लागि एकताबद्ध भएर अगाडि बढ्ने विश्वास व्यक्त गरे । कार्यक्रममा नेपाल सद्भावना पार्टीका महासचिव राजेन्द्र चौधरी र नागरिक उन्मुक्ति पार्टीका लक्ष्मण थारुलगायत दुवै पार्टीका केन्द्रीय, प्रादेशिक र जिल्लास्तरीय नेता कार्यकर्ताको उपस्थिति रहेको थियो ।
