- २०८१ बैशाख १७ सोमबार
काठमाडौँ । स्विडेनका स्ट्राइकर जलाटन इम्ब्रहिमोविचले म्यान्चेस्टर युनाइटेडमा पुनरागमन गरेका छन् ।
गतबर्ष एक सिजनका लागि मात्र सम्झौता गरेका इम्ब्रहिमोविचले यस बर्ष पनि पुन: समझौता गरेका छन् ।
म्यान्चेस्टर युनाइटेडले विहिबार इम्ब्रहिमोविचको युनाइटेडमा पुनरागमन भएको घोषणा गरेको हो । इम्ब्रहिमोविचले गत सिजनमा युनाइटेडबाट ४६ खेल खेल्दै २८ गोल गरेका थिए ।
सिजनको अन्त्य तिर घाइते भएका ३५ बर्षिय इम्ब्रहिमोविच हाल इन्जुरीबाट ठिक भएर खेल्नका लागि तयार भएका छन् ।
इम्ब्रहिमोविच युरोपका चार फरक लिगमा उपाधि जित्ने पहिलो खेलाडी हुन् । उनले आफ्नो व्यवसायिक फुटबल सन् १९९९ मा स्विडेनको माल्मो क्लबबाट गरेका थिए ।
म्यान्चेस्टर युनाइटेडका म्यानेजर जोसे मोरिन्होले अनुभवी इम्ब्रहिमोविचले खेलमा फर्किएकोमा खुशी व्यक्त गर्दै आफुहरु उनको पुनरागमनको व्यग्र प्रतिक्षामा रहेको बताए । उनको युनाइटेडमा दोस्रो सिजन महत्वपूर्ण हुने मोरिन्होले प्रतिक्रिया दिएका छन् ।
इम्ब्रहिमोविचले युनाइटेडमा पुनरागमनको सम्झौता भएपछि आफुले सुरु गरेको कुराको अन्त्य गर्न युनाइटेड फर्किएको बताए । उनले छिट्टै युनाइटेडको टिममा फर्किने पनि जानकारी दिए ।
युनाइटेडमा इम्ब्रहिमोविचले १० नम्बर जसरी लगाउने क्लबले जनाएको छ ।
