- २०८१ बैशाख १५ शनिबार
काठमाडौँ । पाकिस्तानका पूर्वप्रधानमन्त्री तथा पाकिस्तान तहरीक–ए–इन्साफ (पीटीआई) का अध्यक्ष इमरान खानले पाकिस्तानी संसदको नौ सिटका लागि हुने उपचुनावमा सबै सिटबाट आफुले उम्मेदवारी दिने घोषणा गरेका छन् ।
निर्वाचन आयोगले संसदको ११ सिटका लागि उपनिर्वाचन गर्ने घोषणा गरेको छ । ११ मध्ये ९ सिट सामान्य र दुई सिट आरक्षित छन् । इमरान खानले सबै नौ सिटबाट चुनाव लड्ने निर्णय गरेका छन् । यी सिटहरू पीटीआई सांसदहरूले राजीनामा दिएपछि खाली भएका हुन् ।
पाकिस्तानी कानून अनुसार एकभन्दा बढी सिटमा उम्मेदवार हुन चाहनेलाई कुनै प्रतिबन्ध छैन ।
पूर्व केन्द्रीय मन्त्री र पीटीआई नेता फवाद चौधरीका अनुसार इमरान खानले आफूले नौ सिटबाट चुनाव लड्ने निर्णय गर्नु भनेको शाहबाज शरीफ सरकारको राजनीतिक चालको प्रतिक्रिया भएको बताएका छन् ।
राजनीतिक विश्लेषकहरू भन्छन्, इमरान खान आफैले नौ सिटमा चुनाव लड्ने निर्णय गरेका छन् किनभने यदि उनले यी सिटहरू जिते भने सरकारी निकायहरूले उनीविरुद्ध गर्ने योजनामा कारवाहीलाई असर गर्नेछ ।
इमरान खानको पार्टी अहिले विदेशी कोषको मुद्दाको सामना गरिरहेको छ र भर्खरै निर्वाचन आयोगले उनको पार्टीलाई विदेशी कोषको मुद्दामा दोषी ठहर गरेको थियो ।
इमरान खानले २०१५ को आम चुनावमा पनि पाँच सिटबाट चुनाव लडे र सबै पाँच सिट जितेका थिए ।
एकातिर इमरान खानले संसदको नौ सिटमा हुन लागेको उपनिर्वाचनमा सबै ९ सिटबाट उम्मेदवार हुने घोषणा गरेका छन् भने अर्कोतर्फ उनको पार्टीले निर्वाचन आयोगको निर्णयलाई चुनौती दिँदै अदालत पुगेको छ । एक्सप्रेस अखबारका अनुसार, पूर्व केन्द्रीय मन्त्री फवाद चौधरीले पार्टीले निर्वाचन आयोगको निर्णयलाई इस्लामाबाद उच्च अदालतमा चुनौती दिएको जानकारी दिएका छन् ।
पीटीआईले आफ्ना सांसदको राजीनामासम्बन्धी मामिलामा अदालतको निर्णय नआएसम्म निर्वाचन आयोगको कुनै पनि निर्णयलाई रोकिनुपर्ने बताएको छ । पीटीआईको अपील स्वीकार गर्दै अदालतले बुधबार १० अगस्टमा सुनुवाइ गर्ने निर्णय गरेको छ ।
