- २०८१ बैशाख १८ मंगलबार
काठमाडौं । कांग्रेस जिल्ला सभापतिहरूको जारी राष्ट्रिय भेलामा १३ औँ महाधिवेशनमा सभापति शेरबहादुर देउवाका निकट जिल्ला सभापतिहरु उनीविरुद्ध खनिएका छन् ।
पौडेल र सिटौलापक्षीय सभापतिहरूले नेतृत्वको तीव्र आलोचना गरिरहेका बेला देउवानिकट जिल्ला नेताहरू नै उनी विरुद्ध उभिएका हुन् ।
मंगलबारबाट सुरु भेलामा बिहीबार देउवानिकट स्याङ्जा जिल्ला सभापति कमल पंगेनीले सर्वसत्तावाद र अधिनायकवाद लाद्न कम्युनिस्टहरू उद्यत रहे पनि त्यसलाई रोक्न कांग्रेस नेतृत्व कमजोर सावित भएको आरोप लगाए । उनले नेतृत्वको विरोध वा आलोचना नभई ‘समालोचना’ गरेको दाबी गरे ।
‘नेतृत्व गर्नेको आलोचना हुनु स्वाभाविक हो तर हामीले समालोचना गरेका छौँ,’ उनले भने, ‘यो आरोप–प्रत्यारोपभन्दा पनि पार्टीलाई सुदृढ बनाउन जाहेर भएको चासो र चिन्ता हो ।’
देउवा पक्षकै भनेर चिनिएका ललितपुर सभापति मदन अमात्य, डडेलधुरा सभापति कर्ण मल्ललगायतले पनि सभापतिको कडा शब्दमा आलोचना गरेका छन् । उनीहरूले पार्टीमा निषेधको राजनीति गरेको, सबैलाई नसमेटेको, टिकट वितरणमा गल्ती भएको, संसद्मा बलियो भूमिका निभाउन नसकेको र समसामयिक राजनीतिक, सामाजिक मुद्दामा समेत कमजोर देखिएको आरोप लगाएका छन् ।
काठमाडौं जिल्ला सभापति कृष्ण (सबुज) बानियाँले ‘आसेपासे’ का कारण सभापति कमजोर बन्दै गएको बताए । ‘सभापति व्यक्तिको पछाडि लाग्नु भएन, काम गर्नेको मूल्यांकन हुनुपर्योन भन्ने सुझाव राखेको छु,’ उनले भने, ‘नजिकका मान्छेलाई बलियो बनाउने क्रममा तपाईं कमजोर हुनुभएको छ, बलियो बन्नुस् ।’ उनले कोही–कसैप्रति लक्षित गरेर आरोप–प्रत्यारोप नगरेको दाबी गर्दै पार्टीलाई संस्थागत गर्ने उद्देश्य मात्र रहेको बताए ।
सिन्धुलीका सभापति उज्ज्वल बरालले पार्टीका सबै नेताको आलोचना भए पनि सभापतिलक्षित बढी भएको बताए । ‘जिम्मेवारीमा हुनेकै आलोचना हुने हो तर सभापतिलाई नै लक्षित गरेर बढी भएको छ,’ बरालले भने, ‘पार्टी एक तर नेताको मन अनेक भएकाले यो भेलाले एकताबद्ध भएर अघि बढ्न प्रेरणा दिन्छ ।’
रामेछाप सभापति लवश्री न्यौपानेले भने नेतृत्वको आलोचना हुनु स्वाभाविक भएको तर्क गरे । ‘आन्तरिक छलफलमा नेतृत्वको आलोचना हुनु स्वाभाविक हो,’ उनले भने, ‘माया गर्नेलाई गाली गर्ने पनि अधिकार हुन्छ ।’
भेलामा अधिकांश जिल्ला सभापतिले हारको जिम्मेवारी लिनुपर्ने भन्दै नेतृत्वलाई दोष दिइरहेका छन् । सभापति देउवाको बढी आलोचना भएको छ । धादिङ सभापति रमेश धमलाले भेलापछि नयाँ कार्यक्रमसहित जाने दाबी गरे ।
पार्टी एक ढिक्का बनाउन एकमत - प्रवक्ता शर्मा
विहिबार साँझ आयोजित पत्रकार सम्मेलनमा पार्टी प्रवक्ता विश्वप्रकाश शर्माले जिल्ला सभापतिको राष्ट्रिय भेलामा साँझसम्ममा बोल्ने ७७ मध्ये ७४ सभापतिले पार्टीको नेतृत्वमा सधैँ पार्टी एक ढिक्का बनाउन आत्मादेखि प्रतिबद्धता हुनुपर्नेमा जोड दिएको बताए ।
उनले भेलाले संघीय प्रणालीअनुरुप प्रदेश, स्थानीय तह, वडामा पार्टी समिति स्थापना गर्न र विधिवत् अधिवेशन गराई निर्वाचन गराउन महासमिति र केन्द्रीय समितिको बैठकले निर्णय गरी विधान पारित गराउन सुझाव दिएको जानकारी दिए ।
सभापतिका सुझावलाई अभिलेखमा उतारी विधानको मस्यौदा तर्जुमा गर्न कार्यदल बनाइने भएको छ । प्रवक्ता शर्माले केही जिल्ला सभापतिले धर्मनिरपेक्षतालाई पुनः आत्मसमीक्षा गर्न सुझाव दिएको जानकारी पनि दिए ।
