मेटापछि गुगलले पनि बन्द गर्यो डिइआई कार्यक्रम

काठमाडौँ । मेटा पछि, अब अल्फाबेट-नियन्त्रित गुगलले पनि कर्मचारी भर्ना गर्दा विविधता, समानता र समावेशीकरण (डिइआई ) लाई अधार नबनाउने भएको छ ।

गुगलले आफ्नो डिइआई कार्यक्रमको समीक्षा सुरु गर्ने र कम प्रतिनिधित्व भएका समूहहरूबाट थप कर्मचारीहरू भर्ना गर्ने कार्यक्रमहरू अन्त्य गर्ने निर्णय गरेको छ ।

गुगलले कर्मचारीहरुलाई पठाएको एक इमेलमा यस सम्बन्धि जानकारी दिएको हो । इमेलमा भनिएको छ- '२०२० मा, हामीले विविधतामा आधारित भर्ना लक्ष्यहरू तय गर्यौं र प्रतिनिधित्व सुधार गर्न क्यालिफोर्निया र न्यूयोर्क बाहिर हाम्रा कार्यालयहरू बढाउनमा ध्यान केन्द्रित गर्यौं, तर भविष्यमा हामीसँग अब कुनै महत्वाकांक्षी लक्ष्यहरू हुने छैनन् ।'

सन् २०२० मा प्रहरीको हातबाट जर्ज फ्लोयड र अन्य अश्वेत अमेरिकीहरूको मृत्युको विरोधमा भएको विरोध प्रदर्शनपछि गुगल धेरै वर्षदेखि थप समावेशी नीतिहरूको लागि जोड दिने सबैभन्दा मुखर कम्पनीहरू मध्ये एक रहेको थियो । गुगल र मेटाको यो कदमलाई ठूलो परिवर्तनको रूपमा हेरिएको छ, जुन अन्य अमेरिकी कम्पनीहरूमा पनि भइरहेको छ । 

विशेष गरी २०२३ मा अमेरिकी सर्वोच्च अदालतको फैसला पछि, धेरै कम्पनीहरू आफ्ना डिइआई कार्यक्रमहरूलाई पुनरावलोकन गरिरहेका छन् ।