रुसले खोपको घोषणा गरेपछि विश्वभरका क्यान्सर रोगीमा जाग्यो आशा

काठमाडौँ । रुसले क्यान्सरविरुद्धको खोप घोषणा गरेपछि विश्वभरका क्यान्सर रोगीमा आशा जगाएको छ । रुसी स्वास्थ्य मन्त्रालयको रेडियोलोजी मेडिकल रिसर्च सेन्टरका निर्देशक आन्द्रेई काप्रिनका अनुसार यो रुसी क्यान्सर भ्याक्सिन विभिन्न प्रकारका रोगीहरूका लागि फरक तरिकाले बनाइनेछ ।

यो सुविधाका कारण यसको मूल्य करिब ४ लाख रुपैयाँ हुनेछ । रुसी नागरिकले यो खोप नि:शुल्क पाउनेछन् । यद्यपि कपरिनले यो खोप बाँकी विश्वमा कहिले उपलब्ध हुने भन्नेबारेमा कुनै जानकारी दिएको छैन ।

कपरिनले प्रि-क्लिनिकल ट्रायलमा यो खोप प्रभावकारी साबित भएको बताएका छन् । यसले ट्यूमरको वृद्धिलाई सुस्त बनाउँछ र ८० प्रतिशत सम्मको कमी देखाएको छ । यो भ्याक्सिन बिरामीको ट्युमर सेलको डाटामा आधारित विशेष कार्यक्रम मार्फत डिजाइन गरिएको बताइएको छ ।

रूसको संघीय मेडिकल बायोलोजिकल एजेन्सीकी प्रमुख भेरोनिका स्वरोत्स्कोवाले मेलानोमा (छालाको क्यान्सर) विरुद्ध खोपले काम गर्ने तरिका बताएकी छिन् ।

सबैभन्दा पहिले, क्यान्सर रोगीबाट क्यान्सर कोशिकाहरूको नमूना लिइन्छ । यसपछि, वैज्ञानिकहरूले यस ट्युमरको जीनहरू क्रमबद्ध गर्छन् । यस मार्फत क्यान्सर कोशिकाहरूमा बनेको प्रोटिनहरू पहिचान गरिन्छ । प्रोटिनको पहिचान पछि, व्यक्तिगत एमआरएनए भ्याक्सिन बनाइन्छ । टी  कोशिकाहरूलाई दिइएको क्यान्सर खोपले शरीरलाई टी कोशिकाहरू बनाउन आदेश दिन्छ । यी टी कोशिकाहरूले ट्युमरलाई आक्रमण गर्छन् र क्यान्सर हटाउँछन् । यसपछि, मानव शरीरले ट्युमर कोशिकाहरूलाई चिन्न थाल्छ, जसका कारण क्यान्सर फेरि फर्केर आउँदैन ।

अमेरिकी राज्य फ्लोरिडाका क्यान्सर विशेषज्ञ इलियास सयुरका अनुसार यस प्रविधिको प्रयोग गरेर बनाइएको खोपले ४८ घण्टाभन्दा कम समयमा मस्तिष्कको क्यान्सरमा प्रभाव देखाएको छ ।

रुसी स्वास्थ्य मन्त्रालयको नेशनल मेडिकल रिसर्च रेडियोलोजिकल सेन्टरको वेबसाइटका अनुसार क्यान्सरसँग लड्न दुई प्रकारका अनुसन्धान भइरहेको थियो। यी मध्ये पहिलो एमआरएनए भ्याक्सिन हो र दोस्रो ओन्कोलाइटिक भाइरोथेरापी हो ।

यस थेरापी अन्तर्गत, क्यान्सर कोशिकाहरूलाई लक्षित गरी प्रयोगशालामा परिमार्जन गरिएका मानव भाइरसहरूद्वारा संक्रमित गरिन्छ । जसका कारण क्यान्सर कोशिकाहरूमा भाइरस आफैं बढ्छ । फलस्वरूप क्यान्सर कोशिका नष्ट हुन्छ। अर्थात्, यस थेरापीमा ट्युमरलाई सिधै नष्ट गर्नुको सट्टा रोग प्रतिरोधात्मक क्षमता सक्रिय गरेर क्यान्सरका कोशिकाहरूलाई नष्ट गरिन्छ । यस थेरापीको लागि बनाइने भ्याक्सिनको नाम एन्टेरोमिक्स हो । यस खोपको अनुसन्धान चक्र पूरा भएको छ र यसको छिट्टै घोषणा हुनसक्ने बताइएको छ ।