- २०८१ मङ्सिर ७ शुक्रबार
काठमाडौँ । इजरायली सेनाले उत्तरी लेबनानी सहर ब्याट्रोनमा हिजबुल्लाहका एक वरिष्ठ सदस्यलाई नियन्त्रणमा लिएको जनाएको छ ।
इजरायली सेनाका अनुसार उनीहरूले हिजबुल्लाहका एक वरिष्ठ सदस्यलाई शुक्रबार ब्याट्रोनमा नौसेना आक्रमणमा पक्राउ गरेका थिए ।
इजरायली सेनाका एक वरिष्ठ अधिकारीले भने कि हामीले विशेष अपरेशनको एक भागको रूपमा हिजबुल्लाह सदस्यलाई पक्रेर इजरायली क्षेत्रमा लगेका छौं ।
हाल हिजबुल्लाहले इजरायली सेनाको दावीमा कुनै प्रतिक्रिया दिएको छैन ।
लेबनानको सरकारी मिडियाका अनुसार अज्ञात सैन्य बलहरूले बिहानै समुद्र तट नजिकैको एउटा भवनमा छापा मारेका थिए । भवनबाट बाहिरिने क्रममा उनीहरूले एक व्यक्तिलाई समातेर स्पीडबोटमा राखेर लगेको बताइएको छ ।
यो घटनापछि लेबनानी प्रधानमन्त्री नजिब मिकातीको कार्यालयले परराष्ट्र मन्त्रालयलाई संयुक्त राष्ट्र सुरक्षा परिषदमा उजुरी गर्न निर्देशन दिएको बताएको छ ।
प्रधानमन्त्री कार्यालयका अनुसार लेबनानी सेना र संयुक्त राष्ट्र शान्ति सेना युनिफिल दुवैले छापा मारेर अनुसन्धान गरिरहेका छन् ।
लेबनानका यातायात मन्त्री अली हामिदका अनुसार यो कार्य संयुक्त राष्ट्र सुरक्षा परिषद्को प्रस्ताव १७०१ को उल्लङ्घन पनि हुन सक्छ ।
