- २०८१ कार्तिक ६ मंगलबार
रौतहट । रौतहटको मध्यभाग गरुडा नगरपालिका अन्तर्गत एक बर्थिङ सेन्टरमा स्थानीयहरूले तालाबन्दी गरेका छन् ।
स्वास्थ्य कर्मचारी सरुवाको विरुद्धमा गरुडा नगरपालिका ६ पोठीयाही बर्थिङ सेन्टरमा गाउँलेहरुले तालावन्दी गरेका हुन्। बर्थिङ सेन्टरमा कार्यरत स्वास्थकर्मी सी एम ए तारा रामको नगरपालिकाले अरु सेन्टरमा सरुवा गरेको कारण आक्रोसित गाउँलेहरु कर्मचारीलाई बाहिर निकालेर सोमवार तालाबन्दी गरेको छ ।
सिएमए राम लामो समयदेखि पोठीयाही बर्थिङ सेन्टरमा कार्यरत रहेका थिए । उनको जथाभावी सरुवाले महिलाहरुको सुत्केरी सेवा प्रभावीत हुने भएकाले सरुवा बदर हुनुपर्ने स्थानिय समाजसेवी सुनिल कुमार साहले बताएका छन् ।
स्वास्थ्यकर्मी रामको सरुवा बदर नभएसम्म बर्थिङ सेन्टरको ताला न खोलिने पोठीयाही बासीले अडान लिएका छन् । गरुडा ६ का वडा अध्यक्ष रामबाबु चौधरीले बर्थिङ सेन्टरमा तालाबन्दीको पुष्टी गरेका छन्। नगरपालिकाले जथाभावी वडासँग सल्लाह नै नगरी स्वास्थ कर्मचारी सरुवा गरेको परिणाम भएको अध्यक्ष चौधरीले गुनासो गरेका छन् । सहज रुपमा स्वास्थ सेवा प्रवाह भईरहँदा स्वास्थ्यकर्मीको सरुवा गरेर नगरपालिकाले अनावश्यक तनाब थपेको आक्रोस व्यक्त गरेका छन्।
गरुडा नगरपालिकाका मेयर कन्थमणि जैसवालले बर्थिङ सेन्टरमा तालाबन्दी भएको बारे जानकारी नरहे पनि यसै सूचनाको आधारमा घटना बारे पता लगाएर ताला खुलाउने पहल गर्ने बताएका छन् ।
