- २०८१ बैशाख २७ बिहीबार
काठमाडौं । नेकपा एकीकृत समाजवादी र राष्ट्रिय एकता अभियानका संयोजक वामदेव गौतमबीच पार्टी एकता गर्ने विषयमा छलफल शुरु भएको छ ।
एकीकृत समाजवादीको पार्टी कार्यालय आलोकनगरमा मंगलबार अध्यक्ष माधव नेपालसहित शीर्ष नेताहरुसँग वामदेवले छलफल गरेका हुन् । छलफल सकारात्मक भएको नेताहरुले बताएका छन् ।
नेता गौतमसँगको छलफलमा एकीकृत समाजवादीका अध्यक्ष नेपालसहित महासचिव घनश्याम भुसाल, जीवनराम श्रेष्ठ र गंगालाल तुलाधर सहभागी थिए ।
एमाले परित्याग गरेर कम्युनिष्ट पार्टी एकता अभियान चलाएका गौतम अहिले सो अभियानलाई पार्टी दर्ता गरेर चलाइरहेका छन् ।
वामदेवले यसअघि एमाले अध्यक्ष केपी शर्मा ओलीसँग पनि पटक पटक छलफल गरेका थिए ।
