- २०८१ बैशाख १८ मंगलबार
धनगढी । प्रदेश नं ७ को प्रदेशसभाको आजको दोस्रो बैठकले आर्थिक कार्यविधि ऐन पारित गर्नका लागि प्रस्तुत गरिएको नियम निलम्बन गर्नेसम्बन्धी प्रस्ताव सर्वसम्मतिले पारित गरेको छ ।
उक्त प्रस्ताव दर्ता गराउनुभएका प्रदेशसभा सदस्य तारा लामा तामाङले नियमावलीको सामान्य प्रक्रियाबमोजिमको विधेयक पारित गर्ने प्रक्रिया अगाडि बढाउँदा विलम्ब हुन गई बजेटसमेतमा असर पर्ने भन्दै प्रदेश नं ७ प्रदेश सरकारको आर्थिक कार्यविधि नियमित तथा व्यवस्थित गर्न बनेको विधेयक, २०७४ पारित नभएसम्मका लागि उक्त विधेयकको हकमा मात्र लागू हुने गरी प्रदेशसभा नियमावलीको नियम ११० को उपनियम १ र २ निलम्वन गरी सभामा छलफल गरियोस् भन्ने प्रस्ताव बैठकमा प्रस्तुत गरेका थिए ।
प्रस्तावको समर्थन नेकपा ९माओवादी केन्द्र०का सदस्य अक्कलबहादुर रावलले गरेका थिए । बैठकमा प्रदेश सरकारका आर्थिक मामिला तथा योजना मन्त्री झपटबहादुर बोहराले उक्त प्रस्तावमाथि विचार गरियोस् भनी राखेको प्रस्तावको समान्य छलफलमा छ जना सदस्यले भाग लिए ।
छलफलमा भाग लिने सदस्यले विधेयकमा भएका भाषागत त्रुटि, थप गर्नुपर्ने र कटौती गर्नुपर्ने बुँदालगायतमा आ–आफ्नो राय सुझाव दिएका थिए ।
विधेयकमाथि भएको छलफलमा भाग लिने सदस्यमा काँग्रेसका भरतबहादुर खड्का, रणबहादुर रावल र कर्णबहादुर मल्ल, एमालेका पूर्णा जोशी, लीलाधर भट्ट र तारालामा तामाङ थिए ।
छलफलपछि आर्थिक मामिला तथा योजनामन्त्री बोहराले दफाबार छलफलका लागि उक्त विधेयकलाई विधायन समितिमा लगियोस् भनी प्रस्तुत गरेको प्रस्तावलाई पनि बैठकले स्वीकृति दिएको छ ।
यसअघि आजै बसेको पहिलो बैठकमा मन्त्री बोहराले प्रदेश सरकार आर्थिक कार्यविधि नियमित तथा व्यवस्थित गर्न बनेको विधेयक, २०७४ प्रस्तुत गरेका थिए ।
पहिलो बैठकको कारबाही प्रारम्भ हुनासाथ विशेष समय लिएर बोल्ने नेपाली काँग्रेसका प्रदेशसभा सदस्य भरतबहादुर खड्काले युरोपियन युनियनले नेपालको निर्वाचनसम्बन्धी दिएको प्रतिवेदनले संविधानको बर्खिलाप गरेको भन्दै त्यो प्रतिवेदन अस्वीकार गर्न माग गरे ।
उनले गहुँ काट्ने समयमा कैलाली, कञ्चनपुरलगायतका जिल्लामा किसानले डिजेलको अभाव झेलिरहेकाले यसको बन्दोबस्त मिलाउन सदनको ध्यानाकर्षण गराए ।
विशेष समयपछिको शुन्य समयमा बोल्ने प्रदेशसभा सदस्य नेकपा एमालेका अर्चना गहतराज, कुलवीर चौधरी, कृष्णराज सुवेदी, गेल्बुसिं बोहरा, नेपाली काँग्रेसका अम्बिकुमारी थापा, उमाकुमारी बादी, कर्णबहादुर मल्ल, डिल्लीराज पन्त, नेकपा माओवादी केन्द्रका अक्कलबहादुर रावल र राष्ट्रिय जनता पार्टीका कृष्णबहादुर चौधरीले प्रदेशका विभिन्न समस्याको समाधानमा ध्यान दिन आग्रह गरे ।
