- २०८१ बैशाख १७ सोमबार
भीमदत्तनगर । वन तथा वातावरणमन्त्री प्रेम आलेले महाकाली करिडोर निर्माण सहज हुने बताएका छन् । भीमदत्त नगरपालिकाले आयोजना गरेको चौथो शुक्लाफाँटा पर्यटन महोत्सवको उद्घाटन कार्यक्रममा उनले सो करिडोरका लागि वन मन्त्रालयबाट भइरहेको बाधा व्यवधान हटाउने प्रतिबद्धता जनाए ।
करिडोर कञ्चनपुरको ब्रम्हदेवदेखि डडेल्धुरा, बैतडी हुँदै दार्चुलासम पुग्ने छ । उनले नेपाल र भारतबीच जोड्न महाकाली नदीमा निर्माण भइरहेको चार लेनको पुलका लागि २५० क्वीन्टलका ढुङ्गा आवश्यकता परेको र वनको मापदण्ड अनुसार समस्या भएको गुनासोलाई वन मन्त्रालयले सहज बनाउने बताए । सो पुल निर्माणको काम लगभग अन्तिम चरणमा पुगेको छ । उक्त पुल निर्माणको शुरूआत केपी शर्मा ओली पहिलो पटक प्रधानमन्त्री हुँदा गरिएको थियो ।
मन्त्रालयले सात वटै प्रदेशमा चिडियाखाना निर्माणको पहल गर्ने मन्त्री आलेलेले जानकारी दिए । साथै उनले नेपालमा पनि २५ ठाउँमा खुला चिडियाखाना बनाइने बताए । कञ्चनपुरमा २०५८ सालदेखि समस्याका रूपमा रहेको आररक्ष विस्थापितको समस्यालाई समाधान गर्न मन्त्री आलेले चाँडै जग्गाधनी बनाउने गरेर प्रक्रिया थाल्ने प्रतिबद्धता जनाए ।
सो कार्यक्रममा विघठित संसद्का सांसद निरू पाल, सुदूरपश्चिम प्रदेशसभा सदस्य महेशराज जोशी, नगर प्रमुख सुरेन्द्र विष्टलगायतले शुक्लाफाँटा राष्ट्रिय निकुञ्जमा पर्यटनको आगमन बढाउनुपर्नेमा जोड दिए ।
