काठमाडौं । विभिन्न १३ वटा देशका लागि प्रस्तावित राजदूतहरूको संसदीय सुनुवाइ असोज २६ गतेदेखि २८ सम्म हुने भएको छ ।
मंगलबार बसेको प्रतिनिधि सभाअन्तर्गतको संसदीय सुनुवाइ समिति बैठकले प्रस्तावित राजदूतहरूको सुनुवाइ असोज २६ गतेदेखि गर्ने निर्णय गरेको समिति सभापति बोध नारायण श्रेष्ठले जानकारी दिएका छन् ।
असोज २६, २७ र २८ गते सुनुवाइका लागि मिति तोकिएको हो । सभापति श्रेष्ठका अनुसार आजको बैठकमा प्रस्तावित राजदूतविरुद्ध प्राप्त उजुरी खोलि समिति सदस्यहरूलाई वितरण गरिएको थियो । प्रस्तावित राजदूतविरुद्ध ७ वटा उजुरी परेका छन् ।
असोज २ गते बसेको मन्त्रिपरिषद्को बैठकले भारत, चीन, अमेरिकासहित १३ देशका लागि नयाँ राजदूत नियुक्त गर्न नाम सिफारिस गरेको छ । जसमा भारतका लागि डा. निश्चलनाथ पाण्डे, चीनका लागि डा. कल्याणराज शर्मा र संयुक्त राज्य अमेरिकाका लागि चिरनजंग थापाको नाम सिफारिस गरेको छ । त्यस्तै, संयुक्त अधिराज्यका लागि पूर्वप्रधानसेनापति गौरवशमशेर जबराराणा, जापानका लागि जिज्ञनकुमार थापा, इजरायलका लागि सुरेशकुमार कर्ण र स्पेनका लागि प्राप्ति शेरचनलाई प्रस्तावित राजदूतका रूपमा अघि सारिएको छ । जर्मनीका लागि शारू जोशी, ओमानका लागि डा. पद्माक्षी राणा, मलेसियाका लागि चूडामणि खरेल तथा दक्षिण कोरियाका लागि प्रा. डा. संगम श्रेष्ठको नाम सिफारिस गरिएको छ । यसैगरी, श्रीलंकाका लागि डा. मञ्चल झा र साउदी अरेबियाका लागि गिरीबहादुर सुनारलाई राजदूतका रूपमा सिफारिस गरिएको छ ।
संसदीय सुनुवाइबाट अनुमोदन भएपछि सम्बन्धित देशबाट सहमति प्राप्त गर्ने प्रक्रिया अघि बढ्ने र त्यसपछि राष्ट्रपतिबाट राजदूत नियुक्त हुने संवैधानिक व्यवस्था छ ।
