विश्वकपको बहुप्रतिक्षित खेलमा आज राति स्पेन र पोर्चुगल आमने सामने

काठमाडौँ । दुई उपाधि दाबेदार टोली पोर्चुगल र स्पेन फिफा विश्वकप फुटबलको अन्तिम १६ को सबैभन्दा प्रतीक्षित प्रतिस्पर्धामध्ये एकमा  आज राति आमनेसामने हुँदैछन् । डलास स्टेडियममा हुने यो खेल नेपाली समय अनुसार आज राति १२: ४५ बजेदेखि शुरु हुदैछ ।

यो खेललाई प्रतियोगिताको सबैभन्दा आकर्षक भिडन्तका रूपमा हेरिएको छ ।

रोबर्टो मार्टिनेजको प्रशिक्षणमा रहेको पोर्चुगलले अन्तिम ३२ को चरणमा क्रोएसियामाथि निकै कठिन जित निकाल्दै अन्तिम १६ मा स्थान बनाएको थियो । खेलको इन्जुरी समयमा गोन्कालो रामोसले निर्णायक गोल गरेपछि पोर्चुगल विजयी बनेको थियो । त्यसअघि क्रिस्टियानो रोनाल्डोले विश्वकपको नकआउट चरणमा आफ्नो पहिलो गोल गरेका थिए भने अन्तिम समयमा योश्को ग्भार्दिओलको बराबरी गोल भिडियो सहायक निर्णायकको निर्णयपछि रद्द भएको थियो । कठिन संघर्षपछि अघिल्लो चरण पार गरेको पोर्चुगल अब विश्वकपको क्वार्टरफाइनलमा चौथोपटक पुग्ने लक्ष्यमा छ । लगातार दुई संस्करणमा अन्तिम आठमा स्थान बनाउन सफल हुने अवसर पनि उसलाई छ । पोर्चुगलले सन् २००६ पछि लगातार दुई नकआउट खेल जित्न सकेको छैन । त्यसबेला उसले नेदरल्यान्ड्स र इङ्ग्ल्यान्डलाई हराउँदै सेमिफाइनल पुगेको थियो, जहाँ फ्रान्ससँग पराजित भएको थियो ।

यता स्पेन भने प्रतियोगिताकै सबैभन्दा सन्तुलित टोलीमध्ये एकका रूपमा देखिएको छ । स्पेनले यस विश्वकपका पहिलो चार खेलमा एक गोल पनि नखाई अन्तिम १६ मा स्थान बनाएको छ । विश्वकप इतिहासमा पहिलो चार खेलमा लगातार गोल नखाने दोस्रो युरोपेली टोली बनेको स्पेनअघि सन् २००६ मा स्विट्जरल्यान्डले यस्तो उपलब्धि हासिल गरेको थियो । स्पेनले अन्तिम ३२ को खेलमा अस्ट्रियालाई ३-० ले पराजित गरेको थियो । मिकेल ओयार्जाबालले दुई गोल गर्दा पेड्रो पोरोले एक गोल थपेका थिए । सन् २०२२ को विश्वकपमा मोरक्कोसँग पेनाल्टी सुटआउटमा पराजित हुनुअघि पनि स्पेनले निर्धारित समयमा गोल खाएको थिएन । यसपटक पनि पोर्चुगललाई गोल गर्न नदिए स्पेन विश्वकप इतिहासमा लगातार छ खेलमा गोल नखाने पहिलो टोली बन्नेछ ।

खेलअघि स्पेनलाई बलियो दाबेदार मानिएको छ । लुइस दे ला फुएन्तेको टोली पछिल्ला ३४ खेलमा अपराजित छ । यस अवधिमा स्पेनले २५ जित र ९ बराबरी खेलेको छ । यो उसको इतिहासकै सबैभन्दा लामो ३५ खेलको अपराजित यात्रासँग बराबरी गर्ने अवसर पनि हो । युरोपेली टोलीमध्ये सन् २०१८ देखि २०२१ सम्म इटालीले ३७ खेलसम्म अपराजित रहने कीर्तिमान बनाएको थियो ।

स्पेनको अपराजित यात्रा रोक्न पोर्चुगलले कप्तान रोनाल्डोबाट उत्कृष्ट प्रदर्शनको अपेक्षा गरेको छ । रोनाल्डोले स्पेनविरुद्ध चार गोल गरेका छन्, जुन कुनै पनि खेलाडीले स्पेनविरुद्ध गरेको संयुक्त रूपमा सबैभन्दा धेरै गोल हो ।

यता स्पेनका ओयार्जाबाल पनि उत्कृष्ट लयमा छन् । उनले यस विश्वकपमा चार गोल गरिसकेका छन् । सन् २०१० मा डेभिड भिल्लाले पाँच गोल गरेपछि एउटै विश्वकप संस्करणमा कुनै स्पेनी खेलाडीले गरेको यो सर्वाधिक गोल हो ।

दुवै टोलीबीच प्रमुख अन्तर्राष्ट्रिय प्रतियोगितामा यसअघि पाँच भेट भएका छन् । दुवैले एक-एक खेल जितेका छन् भने तीन खेल बराबरीमा टुंगिएका छन् । सन् २०१८ को विश्वकपमा दुवै टोलीबीच ३-३ को रोमाञ्चक बराबरी भएको थियो, जसमा रोनाल्डोले ह्याट्रिक गरेका थिए । सन् २०१२ को युरोपेली च्याम्पियनसिपको सेमिफाइनलमा गोलरहित बराबरीपछि स्पेन पेनाल्टी सुटआउटमार्फत फाइनल पुगेको थियो । यद्यपि प्रतिस्पर्धात्मक खेलमा पोर्चुगलले स्पेनविरुद्ध पछिल्ला १२ भेटमध्ये एक खेल मात्र जितेको छ । त्यो जित सन् २००४ को युरोपेली च्याम्पियनसिपको समूह चरणमा नुनो गोमेसको गोलमा आएको थियो । तर पछिल्लो भेटमा भने पोर्चुगलले सन् २०२५ को नेसन्स लिगको फाइनलमा पेनाल्टी सुटआउटमार्फत स्पेनलाई हराएको थियो । यही नतिजाले पोर्चुगललाई यसपटक पनि आत्मविश्वास दिने अपेक्षा गरिएको छ ।