रियल म्याड्रिड कोपा डेल रेको क्वाटरफाइनलमा

काठमाडौँ । रियल म्याड्रिड कोपा डेल रेको क्वाटरफाइनलमा पुगेको छ ।

गएराती सम्पन्न राउण्ड १६ को खेलमा सेल्टा भिगोलाई ५-२ गोल अन्तरले पराजित गर्दै रियल म्याड्रिड प्रतियोगिताको क्वाटरफाइनलमा पुगेको हो ।

निर्धारित ९० मिनेटको खेलमा दुवै टिम २-२ गोलको बराबरी खेलेपछि खेल ३० मिनेटको अतिरिक्त समय खेलिएको थियो । ३० मिनेटको अतिरिक्त समयमा रियल म्याड्रिडले ३ गोल गरेको थियो ।

रियल म्याड्रिडका लागि युवा खेलाडी एन्ड्रीकले २ गोल गरे भने किलीयन एम्बाप्पे, भिनिसियस जुनियर र फेडेरिको भालभर्डेले एक एक गोल गरेका थिए ।

त्यस्तै सेल्टा भिगोका लागि जोनाथन बम्बा र मार्कस एलोन्सोले एक एक गोल गरेका थिए ।

योसँगै कोपा डेल रेको क्वाटरफाइनलमा पुग्ने ८ टिमको टुंगो लागेको छ । जसमा रियल म्याड्रिडसहित बार्सिलोना, एटलेटिको म्याड्रिड, गेटाफे, लेगानेज, ओसासुना, रियल सोसियडाड र भलेन्सिया रहेका छन् । 

अब क्वाटरफाइनलको ड्र जनवरी २० मा हुने छ भने क्वाटरफाइनलका खेलहरु फेब्रुअरीमा हुने छन् ।