- २०८१ कार्तिक १० शनिबार
काठमाडौँ । जर्मनीका चान्सलर ओलाफ शोल्ज भारत भ्रमणमा आएका छन् ।
भारत भ्रमणको क्रममा भारतीयहरूको लागि भिसा कोटाको बारेमा जर्मनीका चान्सलर शोल्जले विशेष घोषणा गरेको भारतीय मिडियाहरुले उल्लेख गरेका छन् । यसै अवसरमा जर्मनीले प्रत्येक वर्ष भारतीयहरूको भिसा कोटा बढाउने निर्णय गरेको छ ।
यसै सन्दर्भमा प्रधानमन्त्री नरेन्द्र मोदीले १८औं एशिया-प्रशान्त सम्मेलन (जर्मन व्यवसाय) लाई सम्बोधन गर्दै जर्मनीले भारतको दक्ष जनशक्तिमा ठूलो विश्वास देखाएको बताएका छन् ।
प्रधानमन्त्रीले जर्मनीले दक्ष भारतीयका लागि हरेक वर्ष भिसाको संख्या २० हजारबाट बढाएर ९० हजार पुर्याएको बताए ।
उनले भने, ‘भारत र जर्मनीबीचको पारस्परिक व्यापार पनि ३० अर्ब डलरभन्दा बढी पुगेको छ । एसिया-प्रशान्त सम्मेलनले युरोपेली संघ र एसिया-प्रशान्त क्षेत्रबीचको सम्बन्धलाई बलियो बनाउन पनि महत्त्वपूर्ण भूमिका खेलेको छ ।'
जर्मनीका चान्सलर शोल्ज भारतमा आयोजना हुने १८औँ एशिया–प्रशान्त सम्मेलनमा सहभागी हुन भारतको राजधानी नयाँ दिल्लीमा उपस्थित भएका छन् ।
