- २०८१ कार्तिक १ बिहीबार
काठमाडौं । प्रतिनिधिसभाको आजको बैठकमा प्रधानमन्त्रीसहित सबै दलका शीर्ष नेताले सम्बोधन गर्ने भएका छन् ।
आज दिउँसो १ बजे बस्ने प्रतिनिधिसभा बैठकमा शीर्ष नेताहरुले सम्बोधन गर्न लागेका हुन् । सरकारले संक्रमणकालीन न्यायसम्बन्धी विधेयक आजै संसदबाट पारित गर्ने तयारी भएकाले त्यसअघि शिर्ष नेताहरुले सम्बोधन गर्न लागेका हुन् । बैठकको सुरुमै प्रधानमन्त्री केपी शर्मा ओलीले विधेयकमा केन्द्रित भएर सम्बोधन गर्ने कार्यक्रम रहेको छ ।
त्यसपछि कानून, न्याय तथा संसदीय मामिला मन्त्री अजय कुमार चौरसियाले 'कानून, न्याय तथा मानव अधिकार समितिको प्रतिवेदनसहित बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) विधेयक, २०७९ माथि छलफल गरियोस्' भनी प्रस्ताव प्रस्तुत गर्नेछन्।
त्यसपछि विधेयकमाथिको छलफल अघि बढ्ने र छलफलमा दलका शीर्ष नेताहरुले मात्र भाग लिने र विधेयक पारित गर्ने कार्यसूची रहेको छ ।
बैठकमा कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्डले बोल्ने कार्यक्रम रहेको छ।
प्रतिनिधिसभाको मङ्गलबारको बैठकमा कानुन, न्याय तथा मानव अधिकार समितिका सभापति विमला सुवेदीले बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) विधेयकसम्बन्धी समितिको प्रतिवेदन, २०८१ पेस गरेकी थिइन् ।
प्रतिनिधिसभाले उक्त विधेयक समितिमा छलफलका पठाएको थियो । विधेयक यही साउन २४ गतेको समितिको बैठकले सर्वसम्मतिले पारित गरेको थियो । समितिमा सहमति हुन नसकेका विधेयकका केही बुँदामा प्रमुख राजनीतिक दलका नेता सम्मिलित तीन सदस्यीय कार्यदलले सहमति गरेपछि यो विधेयक अगाडी बढेको हो ।
