- २०८१ बैशाख १७ सोमबार
काठमाडौँ । यस बर्षको एशिया कप क्रिकेट प्रतियोगिताको आयोजनाको अन्योलका बीच पाकिस्तानले प्रतियोगिताबाट आफ्नो नाम फिर्ता लिन सक्ने देखिएको छ ।
पाकिस्तान क्रिकेट बोर्ड (पीसीबी) ले आफ्नो प्रस्तावित 'हाइब्रिड मोडल'का लागि भारतसहित श्रीलंका, बंगलादेश र अफगानिस्तान बोर्डले अस्वीकार गरेपछि पाकिस्तानले यस प्रतियोगिताबाट बाहिरिने विचार गरिरहेको मिडिया रिपोर्टमा उल्लेख गरिएको छ ।
यसअघि यस वर्ष एसिया कप एकदिवसीय ढाँचामा सेप्टेम्बरमा पाकिस्तानले आयोजना गर्ने भनिएको थियो ।
हाइब्रिड मोडेल के हो ?
पाकिस्तान क्रिकेट बोर्ड (पीसीबी) का प्रमुख नजम सेठीले प्रस्ताव गरेको ‘हाइब्रिड मोडल’ अनुसार पाकिस्तानले एसिया कपका तीनदेखि चार खेल घरेलु मैदानमा आयोजना गर्ने थियो भने भारतसँगका बाँकी खेल तटस्थ स्थानमा आयोजना गर्ने प्रस्ताव गरिएको थियो । भारतले सुरक्षा चिन्ताका कारण पाकिस्तान भ्रमण गर्न अस्वीकार गरेको थियो। उही समयमा, श्रीलंका, बंगलादेश र अफगानिस्तान सबैले भारतीय बोर्डको प्रतियोगिता पाकिस्तानबाट बाहिर सार्ने विचारलाई समर्थन गरेका छन् ।
भारतीय समाचार एजेन्सी पीटीआईका अनुसार यो महिनाको अन्त्यमा एसियाली क्रिकेट काउन्सिलको कार्यकारी बोर्डका सदस्यहरूले औपचारिक बैठक गर्ने तयारी गरेका छन् । तर, पीसीबीलाई अहिले श्रीलंका, बंगलादेश र अफगानिस्तानले एसिया कपका लागि आफ्नो हाइब्रिड मोडल प्रस्तावलाई समर्थन नगर्ने स्पष्ट भएको छ ।
पछिल्लो रिपोर्टहरुमा पाकिस्तानको प्रस्ताव अस्वीकार भएमा पाकिस्तानले प्रतियोगिताबाट आफ्नो नाम फिर्ता लिने बताइएको छ ।
पाकिस्तानसँग दुईवटा मात्र विकल्प
एशिया कपका विषयमा विकसित पछिल्ला घटनाक्रमको विश्लेषण गर्दा अहिले पाकिस्तानसँग दुईवटा मात्र विकल्प छन् । तटस्थ स्थानमा प्रतियोगिता खेल्ने वा प्रतियोगिताबाट नाम फिर्ता लिने । यदि पाकिस्तानले खेलेन भने, यसलाई अझै पनि एशिया कप भनिनेछ, तर प्रसारकले पाकिस्तानको अनुपस्थितिमा सम्झौता पुन: वार्ता गर्नेछ ।
एसिया कप रद्द पनि हुन सक्छ
श्रीलंका, बंगलादेश, अफगानिस्तान र भारत सबै पाकिस्तान र अन्य कुनै पनि देशमा एसिया कप एकैसाथ आयोजना गर्न तार्किक वा आर्थिक रूपमा सम्भव छैन भन्ने अडानमा छन् । यस्तो अवस्थामा कुनै एक देश नखेले पनि प्रतियोगिता अन्य देशमा योजना गर्नुपर्छ । र भारत पाकिस्तान नगएको अवस्थामा यो स्थान श्रीलंका हुन्छ । साथै मिडिया रिपोर्टमा यस बारेमा सहमति नभएमा यस वर्षको एसिया कप पूरै रद्द हुने सम्भावना पनि देखिएको छ र विश्वकप अघि पाकिस्तान बाहेकाका एशिया कप खेल्ने देशहरु बीच एकदिवसीय ढाँचामा बहु टोली सम्मिलित प्रतियोगिता खेल्न सक्छन् ।
अर्को तर्फ भारतले एशिया कप रद्द भएमा विश्वकप अघि बाँकी देशहरुलाई सम्मिलित गराएर अन्य कुनै प्रतियोगिता आयोजना गर्ने विषयमा समेत योजना बनाइरहेको बताइएको छ ।
यस पटकको एशिया कपमा भारत, पाकिस्तान, बंगलादेश, श्रीलंका अफगानिस्तान र नेपाल छनौट भएका छन् ।
