- २०८१ बैशाख ७ शुक्रबार
स्वीडेन । स्वीडेनका यूट्युबर प्युडिपाई विश्वकै प्रसिद्ध यूट्युबर बनेका छन् । उनको यूट्युब च्यानलको सब्स्क्राइबर संख्या १० करोडभन्दा बढी पुगेको छ । यद्यपि, उनको यूट्युब च्यानल सब्स्क्राइबरको संख्यामा दोस्रो स्थानमा छ । पहिलो स्थानमा भने टीसिरिज छ ।
यो समाचार तयार पार्दासम्म टीसिरिजको सब्स्क्राइबर संख्या १० करोड ९७ लाख ८८ हजार पुगेको छ । दोस्रोमा रहेको प्युडिपाईको संख्या भने १० करोड ४ लाख २४ हजार छ । टिसिरिजले चालू वर्षको सुरुमा १० करोड पार गरेको थियो ।
प्युडिपाईलाई यूट्युबले दियो बधाई
व्यक्तिगत ब्लगरको रुपमा प्युडिपाईले यो उपलब्धि पाएकोमा यूट्युबले उनलाई बधाई दिँदै एक छोटो भिडियो बनाएको छ । उक्त भिडियोमा प्युडिपाईको यूट्युब यात्रालाई देखाइएको छ ।
सब्स्क्राइबरको संख्याको विषयमा दोस्रो स्थानमा रहेका २९ वर्षीय प्युडिपाई अघिल्लो दुई वर्षदेखि सबैभन्दा बढी कमाउने यूट्युबरमा कायम छन् ।
फ्यानहरुका अतिप्रिय
स्वीडेनका प्युडिपाई कहिलेकाहिँ विवादमा पनि पर्ने गरेका छन् । तथापि, उनी आफ्ना फ्यानका निकै प्रिय छन् । उनका फ्यानहरुले उनको च्यानल प्रमोट गर्न र सब्स्क्राइबर बढाउन सब्स्क्राइबर टु प्युडिपाई क्याम्पेन नै सुरु गरेका थिए । लन्च हुने बित्तिकै यो क्याम्पेन भाइरल भयो र हेर्दाहेर्दै प्युडिपाई यूट्युबका राजा बने ।
प्युडिपाईविरुद्ध मुद्दा
सन् २०१७ मा प्युडिपाईविरुद्ध एक मुद्दा पनि दर्ता भएको थियो । उनले यहुदीहरुको विरुद्धमा भिडियो बनाएका थिए । अतः डिज्नी मेकर्स स्टुडियो र यूट्युबले उनको रियालिटी सिरिजलाई रद्द गरेका थिए । यद्यपि, यो खबर बाहिर आएपछि प्युडिपाईले माफी पनि मागेका थिए ।
