- २०८३ असोज २० मंगलबार
काठमाडौं । युरोपेली फुटबल महासंघको नेसन्स लिगअन्तर्गत गएराति भएका दुई खेलमा फ्रान्स र इटालीले प्रभावशाली जित निकालेका छन् ।
समूह ‘ए–१’ अन्तर्गत फ्रान्सले बेल्जियमलाई ४–१ ले पराजित गर्दा इटालीले टर्कीलाई ३–१ गोलले हराएको हो ।
पेरिसस्थित रंगशालामा भएको खेलमा फ्रान्सले बेल्जियमविरुद्ध पहिलो हाफमा १–० ले पछि परेको अवस्थालाई उल्टाउँदै शानदार पुनरागमन गरेको थियो । बेल्जियमका लागि डोडी लुकबाकियोले ३५औँ मिनेटमा गोल गर्दै टोलीलाई अग्रता दिलाएका थिए । तर दोस्रो हाफको अन्तिम चरणमा फ्रान्सले खेलको दिशा नै परिवर्तन गर्यो । ७७औँ मिनेटमा देजिरे डुयले लामो दूरीबाट गोल गर्दै फ्रान्सलाई खेलमा फर्काएका थिए । त्यसको केही समयपछि रयान चेर्कीले माइकल ओलिसेको पासमा गोल गरेपछि फ्रान्सले अग्रता लिएको थियो ।
त्यसपछि माइकल ओलिसेले लगातार दुई गोल गर्दै फ्रान्सको जित ४–१ मा पुर्याए । खेलको अन्तिम १३ मिनेटमा फ्रान्सले चार गोल गरेको थियो ।
यो जितसँगै फ्रान्स समूह ‘ए–१’ को शीर्ष स्थानमा थप बलियो बनेको छ । चार खेलबाट फ्रान्सको १० अंक भएको छ । बेल्जियम ६ अंकसहित तेस्रो स्थानमा छ भने इटालीले टर्कीविरुद्धको जितपछि सात अंकसहित दोस्रो स्थानमा स्थान बनाएको छ । टर्की भने लगातार चौथो हारपछि अंकविहीन अवस्थामा समूहको पुछारमा छ ।
अर्कोतर्फ, इटालीले बोलोन्यास्थित रेनातो डालआरा रंगशालामा टर्कीलाई ३–१ ले हरायो । इटालीका लागि जियानलुका स्कामाक्काले सुरुआती गोल गरेका थिए । टर्कीका अराल सिमसिरले गोल गर्दै खेल बराबरीमा ल्याए पनि त्यसपछि इटालीले लगातार दुई गोल गर्दै जित सुनिश्चित गरेको थियो । इटालीका लागि रिकार्डो कालाफियोरी र फ्रान्चेस्को पियो एस्पोसितोले गोल गरे । यससँगै इटालीले समूह चरणमा आफ्नो अंक सात पुर्याउँदै दोस्रो स्थानमा स्थान बनाएको छ । टर्की भने चार खेलबाट कुनै अंक जोड्न नसकेपछि समूहमा कठिन अवस्थामा पुगेको छ ।
नेसन्स लिगको समूह चरणमा अब टोलीहरूले बाँकी दुई खेल खेल्नुपर्नेछ । फ्रान्सले नोभेम्बर १२ मा इटाली र नोभेम्बर १५ मा टर्कीको सामना गर्नेछ । इटालीले नोभेम्बर १२ मा फ्रान्ससँग खेल्नेछ भने अन्तिम खेलमा नोभेम्बर १५ मा बेल्जियमसँग प्रतिस्पर्धा गर्नेछ ।
