पाकिस्तानका क्रिकेट इमाममाथि अनुसन्धान हुदै, २ वर्षसम्म प्रतिबन्ध लाग्न सक्ने

काठमाडौँ । पाकिस्तानका ब्याटर इमाम उल हकलाई लर्ड्समा भएको टेस्टमा पिँडौलामा लागेको चोटसँग सम्बन्धित विषयमा १ देखि २ वर्षसम्म प्रतिबन्ध लाग्न सक्ने भएको छ ।

जियो न्युजका अनुसार पाकिस्तान क्रिकेट बोर्डले इमामको पिँडौलाको चोटसम्बन्धी विषयमा छानबिन गर्न समिति गठन गर्ने तयारी गरेको छ । छानबिनका क्रममा इमाम दोषी पाइएमा उनीमाथि १ देखि २ वर्षसम्म प्रतिबन्ध लगाउन सकिने जनाइएको छ ।

इङ्ल्यान्डविरुद्ध लर्ड्स टेस्टको पहिलो दिन फिल्डिङ गर्ने क्रममा इमामको पिँडौलामा सामान्य चोट लागेको थियो । त्यसपछि उनले पाकिस्तानको दुवै इनिङ्समा ब्याटिङ गर्न सकेनन् । पाकिस्तान पहिलो इनिङ्समा ११० रनमै अलआउट भएको थियो । दोस्रो इनिङ्समा ३८९ रनको लक्ष्य पछ्याएको पाकिस्तान १९४ रनमा समेटिएको थियो । इङ्ल्यान्डले उक्त टेस्ट १९४ रनले जितेको थियो ।

इमामको चोट र त्यसपछि उनी टोलीबाट बाहिरिएको विषयमा पाकिस्तान क्रिकेट बोर्डले छानबिन गर्ने निर्णय गरेको हो । इमाम यसअघि पनि चोटसम्बन्धी विवादमा परेका थिए । सन् २०२५ को मार्चमा न्युजील्यान्ड भ्रमणका क्रममा इन्डोर अभ्यासका क्रममा बलले उनको दायाँ खुट्टाको बुढीऔँलामा लागेको थियो । जियो न्युजका अनुसार त्यस विषयमा पाकिस्तान क्रिकेट बोर्डले गठन गरेको छानबिन समितिले इमामले चिकित्सकीय टोलीलाई भ्रममा पारेको र चोटका लक्षणलाई गलत रूपमा प्रस्तुत गरेको निष्कर्ष निकालेको थियो ।

समितिले पहिलो एकदिवसीय खेलमा सहभागी नहुन इमामले आफ्नो चोटलाई बढाइचढाइ गरेको निष्कर्ष निकालेको थियो । इमामसँगै विकेटकिपर ब्याटर मोहम्मद रिजवान पनि अनुशासनसम्बन्धी विषयमा पाकिस्तान क्रिकेट बोर्डको छानबिनमा परेका छन् ।

जियो न्युजका स्रोतका अनुसार बोर्डले आगामी दिनमा रिजवानसँग सोधपुछ गर्न सक्नेछ । निकट भविष्यमा पाकिस्तानी टोलीमा उनको पुनरागमनको सम्भावना कम रहेको पनि समाचारमा उल्लेख गरिएको छ ।

इङ्ल्यान्डविरुद्ध लर्ड्स टेस्टमा १९४ रनले पराजित भएपछि पाकिस्तानले टेस्ट टोलीमा ठूलो परिवर्तन गरेको छ । इमाम र रिजवानसहित सात खेलाडीलाई टोलीबाट बाहिर राखिएको छ । टोलीबाट बाहिरिने अन्य खेलाडीमा सलमान आगा, अली उस्मान, आमिर जमाल, ओवैस जफर र खुर्रम शहजाद रहेका छन् ।

तेस्रो टेस्टका लागि पाकिस्तानले पाँच नयाँ खेलाडीलाई टोलीमा समावेश गरेको छ। अराफात मिन्हास, मोहम्मद इमरान जुनियर, साद बेग, मोहम्मद इमरान रन्धावा र रजाउल्लाहलाई टोलीमा स्थान दिइएको छ। साम अय्युब र अब्दुल्लाह फजलले पनि टोलीमा स्थान पाएका छन् ।

इङ्ल्यान्ड र पाकिस्तानबीचको शृंखलाको तेस्रो तथा अन्तिम टेस्ट सेप्टेम्बर ९ देखि एजबास्टनमा हुनेछ। इङ्ल्यान्ड सिरिजमा २–० ले अघि रहेको छ ।

पाकिस्तान अब अन्तिम टेस्ट जित्दै सिरिजमा क्लिन स्वीप हुनबाट जोगिने प्रयासमा हुनेछ ।