व्यावसायिक फुटबल खेल्ने तयारीमा अभिनेता टाइगर श्रफ

काठमाडौं । भारतीय अभिनेता टाइगर श्रफ व्यावसायिक फुटबलमा डेब्यु गर्ने तयारीमा रहेका छन् । उनी मुम्बई एफसीको टोलीमा आधिकारिक रूपमा दर्ता भइसकेका छन् र चाँडै दुरान्ड कप फुटबल प्रतियोगितामा टोलीबाट मैदान उत्रिन सक्ने सम्भावना रहेको छ ।

मुम्बई एफसीका सह-स्वामित्वकर्ता जोहेब अमरानीका अनुसार टाइगर अहिले टोलीसँग नियमित प्रशिक्षणमा छन् । उनी समूह चरणका खेलका लागि टोलीसँगै शिलाङ यात्रा गर्न सक्ने सम्भावना रहेको छ । टाइगरजस्ता चर्चित कलाकारसँग सुरक्षा व्यवस्थालाई विशेष प्राथमिकता दिनुपर्ने भएकाले आवश्यक तयारी भइरहेको उनले बताए ।

अमरानीले सामाजिक सञ्जालमा हुने तीव्र प्रतिक्रियालाई समेत ध्यानमा राखेर टाइगरको खेल्ने मिति तय गरिएको जानकारी दिए । सबै तयारी अनुकूल भएमा उनले कम्तीमा एक खेलमा टोलीबाट मैदान उत्रिने अपेक्षा गरिएको छ ।

टाइगर श्रफ सन् २०२४ मा मुम्बई एफसी स्थापना भएदेखि नै क्लबसँग आबद्ध छन् । उनले यसअघि मुम्बई जिल्ला लिगमा पनि सहभागिता जनाइसकेका छन् । अमरानीले सन् २०२३ मा आयोजित एक प्रभावशाली व्यक्तिहरूको फुटबल प्रतियोगितामा पहिलो पटक टाइगरको खेल देखेपछि उनलाई टोलीसँग जोड्ने योजना बनाइएको बताएका छन् ।

दुरान्ड कपअन्तर्गत मुम्बई एफसीले आफ्ना सबै समूह चरणका खेल शिलाङस्थित जवाहरलाल नेहरू रङ्गशालामा खेल्नेछ । टोलीले अगस्ट ३ मा लाङ्सनिङ एससीविरुद्ध पहिलो खेल खेल्नेछ भने अगस्ट ८ मा शिलाङ लाजोङ र अगस्ट ११ मा नोङकसेह एसएस एन्ड सीसीसँग प्रतिस्पर्धा गर्ने तालिका रहेको छ। अब टाइगर श्रफले फुटबल मैदानमा पनि आफ्नो प्रतिभा देखाउनेछन् कि भन्ने प्रतीक्षामा उनका समर्थक रहेका छन् ।