- २०८३ जेठ ९ शनिबार
काठमाडौँ । इङलिश प्रिमियर लिग क्लब म्यानचेस्टर युनाइटेडले माइकल क्यारिकलाई स्थायी प्रशिक्षक बनाएको छ । क्लबले औपचारिक रुपमा क्यारिकलाई स्थायी जिम्मेवारी दिएको घोषणा गरेको हो ।
अन्तरिम प्रशिक्षकको रूपमा जिम्मेवारी सम्हालेपछि टोलीलाई च्याम्पियन्स लिगमा पुनः पुर्याउन सफल भएका क्यारिकले क्लबको नयाँ नेतृत्वलाई प्रभावित पारेका थिए । यही प्रदर्शनका आधारमा उनलाई दीर्घकालीन परियोजनाको उपयुक्त व्यक्ति मानिएको हो ।
म्यानचेस्टर युनाइटेडले क्यारिकसँग दुई बर्षको सम्झौता गरेको घोषणा गरेको छ । यस अनुसार उनी २०२८ को जुनसम्म क्लबमा रहने छन् ।
म्यानचेस्टर युनाइटेडका पूर्व खेलाडी समेत रहेका ४४ बर्षिय क्यारिकले गत जनवरी १३ देखि अन्तरिम प्रशिक्षकको जिम्मेवारी सम्हालेपछि १६ खेलमा ११ खेल जिताएर क्लबलाई प्रिमियर लिगमा तेस्रो स्थानमा पुर्याएका थिए ।
उनले आफु २० बर्षअघि क्लबमा आउदादेखि नै म्यानचेस्टर युनाइटेडको जादु आफुले महसुस गरेको र आज क्लबको नेतृत्व गर्ने जिम्मेवारी पाउदा आफुलाई गर्व रहेको बताएका छन् ।
प्रशिक्षकमा नियुक्त भएसँगै अब क्यारिकले क्लबको आउदो सिजनमा खेलाडी भित्र्याउने रणनीति बनाउन शुरु गरेको मिडिया रिपोर्टमा उल्लेख छ ।
