- २०८३ जेठ २ शनिबार
काठमाडौँ । आइपिएल टिम लखनउ सुपर जायन्ट्सका कप्तान ऋषभ पन्तलाई १२ लाख भारतीय रुपैयाँ जरिवाना गरिएको छ । शुक्रबार चेन्नई सुपर किंग्सविरुद्ध भएको खेलमा निर्धारित समयमा ओभर पूरा गर्न नसकेपछि उनीमाथि कारबाही गरिएको हो ।
यो खेल लखनउस्थित अटल बिहारी वाजपेयी इकाना क्रिकेट रंगशालामा भएको थियो । चालु सिजनमा लखनउ टोलीबाट स्लो ओभर रेटको यो पहिलो गल्ती भएकाले नियमअनुसार पन्तलाई आर्थिक जरिवाना मात्रै गरिएको हो ।
इन्डियन प्रिमियर लिगको ओभर रेटसम्बन्धी नियमअनुसार टोलीले तोकिएको समयमा २० ओभर बलिङ पूरा गर्नुपर्छ । त्यसो नगरेमा दोषी ठहरिए कप्तानलाई १२ लाख रुपैयाँ जरिवाना गरिने व्यवस्था छ ।
यदि लखनउले यही सिजन फेरि स्लो ओभर रेटको गल्ती दोहोर्याए कप्तान पन्तमाथिको जरिवाना २४ लाख रुपैयाँ पुग्नेछ । साथै प्लेइङ–११ मा रहेका अन्य खेलाडीलाई पनि म्याच शुल्कको २५ प्रतिशत वा ६ लाख रुपैयाँमध्ये जुन कम हुन्छ, त्यति जरिवाना लाग्नेछ ।
तेस्रोपटक पनि यस्तै गल्ती दोहोरिए कप्तानमाथि ३० लाख रुपैयाँ जरिवाना र एक खेल प्रतिबन्धको कारबाही हुन सक्ने नियममा उल्लेख छ ।
यता खेलको नतिजाले भने आइपिएलको अंक तालिकालाई थप रोचक बनाएको छ । प्लेअफ दौडबाट बाहिरिइसकेको लखनउले आफ्नै मैदानमा चेन्नईलाई हराउँदै उसको समीकरण बिगारेको हो । यो हारपछि चेन्नईको सिधै प्लेअफ पुग्ने सम्भावना कठिन बनेको छ ।
