- २०८३ बैशाख २७ आइतबार
काठमाडौँ । अष्ट्रेलियाका केही वरिष्ठ क्रिकेट खेलाडीहरू क्रिकेट अस्ट्रेलियाले सन् २०२६–२७ का लागि दिएको नयाँ केन्द्रीय सम्झौता प्रस्तावप्रति असन्तुष्ट देखिएका छन्। कम्तीमा पाँच खेलाडीले प्रारम्भिक प्रस्ताव मन नपरेपछि सम्झौतामा हस्ताक्षर गर्न अझै सहमति जनाएका छैनन्।
रिपोर्टअनुसार टेस्ट टोलीका कप्तान पाट कमिन्सलाई आगामी तीन वर्षका लागि वार्षिक ४० लाख अष्ट्रेलियाली डलरको प्रस्ताव गरिएको छ । हालको सम्झौताअनुसार राष्ट्रिय टोलीका २४ खेलाडीले कुल करिब २ करोड १९ लाख अष्ट्रेलियाली डलर आधारभूत पारिश्रमिक बाँडफाँट गर्छन् । सबैभन्दा कम पारिश्रमिक पाउने खेलाडीले पनि वार्षिक ३ लाख ६० हजार डलरभन्दा बढी पाउने व्यवस्था छ ।
खेलाडीहरूले टेस्ट, एकदिवसीय र टी–२० अन्तर्राष्ट्रिय खेलका आधारमा थप भुक्तानी र बोनस पनि पाउँछन् । तर विश्वभरका फ्रेन्चाइज प्रतियोगितामा बढ्दो रकमका कारण धेरै खेलाडी अब केन्द्रीय सम्झौताभन्दा स्वतन्त्र रूपमा खेल्दा बढी कमाइ हुने निष्कर्षमा पुगेका छन्।
मार्कस स्टोइनिस र टिम डेभिड जस्ता खेलाडीले पछिल्ला वर्षमा केन्द्रीय सम्झौता नगरी विभिन्न टी–२० लिग खेल्दै बढी आम्दानी गरेका थिए ।
यसबीच बिग बाश लिगका चर्चित खेलाडीहरू पनि असन्तुष्ट बनेका छन् । बिग ब्यास लिग निजीकरणको योजना रोकिएपछि पारिश्रमिक पुनरावलोकन प्रक्रिया प्रभावित भएको हो । अष्ट्रेलियाली खेलाडीहरूले आफूहरू विदेशी खेलाडीभन्दा वार्षिक १ लाखदेखि २ लाख अष्ट्रेलियाली डलरसम्म कम पारिश्रमिक पाउँदै आएको गुनासो गरेका छन् ।
विदेशी खेलाडीका लागि ‘प्लाटिनम’ सम्झौतामा ४ लाख २० हजार डलरसम्म दिइएपछि अष्ट्रेलियाली खेलाडीहरू थप असन्तुष्ट भएका हुन् । उदाहरणका रूपमा लुक वूड र मोहमद रिजवानले केही अष्ट्रेलियाली स्टारभन्दा धेरै रकम पाएका थिए ।
अब केही अष्ट्रेलियाली खेलाडी संयुक्त अरब इमिरेट्सको टी–२० प्रतियोगिता खेल्न पनि इच्छुक देखिएका छन् । केहीलाई त्यहाँ खेल्न ५ लाख अष्ट्रेलियाली डलरसम्मको प्रस्ताव आएको बताइएको छ । दक्षिण अफ्रिकाको एसए टी-२० प्रतियोगितालाई बिग ब्यास लिगको ठूलो प्रतिस्पर्धी मानिएको छ । अष्ट्रेलियाली खेलाडीहरू विशेषगरी दक्षिण अफ्रिकी टी–२० लिगमा खेलाडीको उच्च मूल्य देखेर असन्तुष्ट बनेका छन् । गत वर्ष डेवाल्ड ब्रेभिस र एडन मार्क्रम करोडौं रुपैयाँ बराबरको सम्झौतामा अनुबन्ध भएपछि बिग ब्यास खेलाडीहरूमा असन्तोष बढेको हो ।
यद्यपि क्रिकेट अस्ट्रेलियाले भविष्यमा बिग ब्यास लिगको तलब सीमा बढाउने योजना बनाइरहेको बताइएको छ । तर हालका लागि खेलाडी र बोर्डबीच पारिश्रमिक विवाद समाधान हुने स्पष्ट संकेत देखिएको छैन ।
