- २०८३ बैशाख ४ शुक्रबार
काठमाडौँ । अन्तर्राष्ट्रिय क्रिकेट परिषद् (आइसीसी) अन्तर्गतको भ्रष्टाचार विरोधी इकाइले क्यानडा क्रिकेटसँग सम्बन्धित सम्भावित भ्रष्टाचारका विषयमा अनुसन्धान अघि बढाएको छ ।
पछिल्लो पुरुष टी-२० विश्वकपमा क्यानडाले खेलेको एक खेल पनि अनुसन्धानको दायरामा परेको जनाइएको छ ।
उक्त इकाइले क्यानडा क्रिकेटसँग जोडिएका विभिन्न विषयमा दुई वटा छुट्टाछुट्टै अनुसन्धान गरिरहेको बताइएको छ । अन्तर्राष्ट्रिय र घरेलु दुवै स्तरमा आचारसंहिता उल्लंघन भएको आशंकामा छानबिन भइरहेको छ । यी आरोपहरू क्यानडाको एक अनुसन्धानमूलक वृत्तचित्रमार्फत सार्वजनिक भएका हुन् ।
वृत्तचित्रमा क्यानडा र न्युजील्याण्डबीच भएको खेलको एक ओभरमाथि विशेष प्रश्न उठाइएको छ । त्यस क्रममा कप्तान दिलप्रीत बजवाले बलिङ गर्दा अस्वाभाविक प्रदर्शन देखिएको आरोप लगाइएको छ । उक्त ओभरमा अतिरिक्त बलहरू सहित धेरै रन खर्चिएको उल्लेख गरिएको छ ।
अर्को अनुसन्धान भने क्यानडाका तत्कालीन प्रशिक्षक खुर्रम चोहानसँग सम्बन्धित अडियो रेकर्डबाट सुरु भएको हो । उक्त अडियोमा बोर्डका केही सदस्यले आफूलाई विशेष खेलाडी छनोट गर्न दबाब दिएको दाबी गरिएको छ । साथै खेल मिलाउने प्रयाससम्बन्धी संकेतहरू पनि रहेको बताइएको छ, तर त्यसलाई पुष्टि गर्न चुनौती रहेको जनाइएको छ । आइसीसीले अनुसन्धान प्रक्रिया अनुसार काम भइरहेको स्पष्ट पारेको विभिन्न मिडिया रिपोर्टमा उल्लेख छ ।
यसैबीच, अर्का पूर्व प्रशिक्षक पुवुदु दासानायकेले पनि टोली चयनमा हस्तक्षेप भएको आरोप लगाएका छन् । उनले दबाब नमानेपछि आफ्नो करार अन्त्य गरिएको दाबी गर्दै कानुनी प्रक्रिया अघि बढाएका छन् ।
क्यानडा क्रिकेट पछिल्लो समय प्रशासनिक विवादमा पनि फसेको छ । नेतृत्व परिवर्तन, आर्थिक समस्या र खेलाडीलाई पारिश्रमिक ढिला हुनेजस्ता विषयहरू पनि सार्वजनिक भएका छन् । यस घटनाक्रमसँगै क्यानडा क्रिकेटमाथि थप निगरानी बढेको छ भने अनुसन्धानको निष्कर्षले आगामी दिनमा महत्वपूर्ण प्रभाव पार्ने अपेक्षा गरिएको छ ।
